بۆچی رووداو-رەنگین؟

 

بەری 17 ساڵان و ب دروستی ل دوماهییا ئادارا 2008ێ، مە ئامادەکاری دکرن بۆ هەلکرنا ئێکەم چرایێ رووداو، ئەوژی هەفتەنامەیا رووداو بوو کو ل دەستپێکا هەیڤا نیسانا هەمان ساڵ ئێکەم هەژمارا وێ رۆناهی دا. مە ژی ب چەند بابەتێن جودا شەرەفا بەشداریکرنێ تێدا هەبوو ب شێوەزارێ بەهدینی. ئەڤرۆ ژی مە چرایەکێ دی ب ناڤێ "رووداو- رەنگین"، ل کۆچکا تۆڕا میدیایی رووداو هەلکر، دا تیشکێن نوی یێن رۆناهیێ پەخش و بەڵاڤکەین و بیاڤێن دیتنێ بۆ هەمیان خوەشتر بکەین.

 

هەڵبەت نکۆڵی ل وێ چەندێ ناهێتە کرن کو تۆرا میدیایی رووداو، پێشەنگا رۆژنامەڤانییا ئازاد و پیشەیییە. رووداو- رەنگین ژی بەشەکە ژ وێ تۆڕێ و دخوازیت بەردەوامیێ بدەتە وێ پێشەنگیێ. ئانکو ئەڤ پرۆژە ژنشکا و ژ ڤالەهیێ دروست نەبوویە. بەلکو رەنگڤەدانا دیدێن ڤی سەردەمی و پێویستییا دەڤەرێ یە. ئارمانج ژێ دابینکرنا بیاڤییە بۆ بابەت و بەرهەمێن تۆڕا میدیایی رووداو کو د زێدەبوونەکا بەردەوام دانە و بەردەوامیدانە ب رێبازەکێ کو ب پلان هاتییە دارشتن و رهوریشالێن وێ ڤەدگەرن بۆ دەستپێکا رووداو و هەتا ئەڤرۆ ژی دهێتە پەیرەوکرن. بەرەف خورتکرنا هەبوونێ ل سەر سۆشیال میدیایێ و قایمکرنا پەیوەندییان دگەل خەلکی.

 

د باوەرییا مە دا میدیا پترە ژ هندێ کو تنێ نووچەیان ڤەگوهێزیت، بەلکو سەکۆیەکە بۆ ئاڤاکرنا جڤاکێن هشیار و کارامە. ئەزموونان ژی سەلماندییە کو سەرکەفتن دپێکڤەکارکرنێ دایە. لەوما ئەم ب شانازیڤە دێ پشوازیێ ل بەشدارییا خەلکی کەین کو ببنە پەیامنێر، وێنەگر و نڤیسەرێن مە ل سەر پێگەهێن مە یێن سۆشیال میدیایێ، دا پێکڤە بچینە ئاسۆیێن نوی ژ زانین و خوەشیێ و هەمی تشتان د دەما خوەدا بینین، ب ئەپدێتێن زەنگین و داهێنەرانە کو دگەل گرنگیدانێن خەلکی دگونجن و ب هیڤینە پێکڤە گوهرینێ چێکەین و سۆشیال میدیایێ رەنگین بکەین.

 

سەردەم سەردەمێ مەیە، ئالەنگاری مە گیروناکەن و ئەم ل هیڤییا دەرفەتان ژی نامینین. لێ ئەم دێ دەرفەتان چێدکەین و یاسایێن یاریێ ل دیجیتاڵ میدیایێ گوهرین. ئەم ب رێکا تەکنەلۆژیا مۆدێرن چیرۆکێن گەرم، ئەزموونێن نوی یێن میدیایی و ئاراستەیێن جیهانی ب ناڤەرۆکەکا تێر دگەل ستافەکێ شارەزا و داهێنەر، ب شێواز و شێوەزارێ ڤێ دەڤەرێ بەرهەمئینین کو رەنگڤەدانا هیڤیێن هەمیانە ژ پلاتفۆرمێن ئێکەما بێ رکابەر بەرەف باش و باشتر.