‏‎هۆتێلێكی پێنج ئەستێرە بۆ من

ئێستا لە پارێزگای دهۆكم، بەدیاریكراوی لەنێو شاری دهۆك، ئەوەی بەچاوی خۆم دەیبینم، تەنیا لە فیلمدا بینومە، رەنگە زۆربەتان لەو فیلمانەتان دیبێت كاتێك تەنیا كەسێك لە هۆتێلێكی گەورەدا دەمێنیتەوە، هەموو ژوورەكان داخراون، ئاسانسۆر لە جووڵە كەوتووە، ریستۆرانت و كافێیەكان پڕن لە كورسی و مێزی بەتاڵ، ئامێرەكانی قاوە دروستكردن بێكارن، بەفرگرەكان بەتاڵن، رووناكی كوژاوەتەوە، هۆڵی وەرزش تەنیا ئاسن و ئامێری تێدایە، مەلەوانگە و ساونا كپ و بێدەنگ، خامۆشی هۆڵی پێشوازی داگرتووە.

 

لەو هۆڵە بێدەنگەدا پەیكەری پیاوێكی گیتار بەدەستی لێیە، بەتانیا خۆی، دەستی لەسەر ژێی گیتارەكە وشكبووە. لێتانناشارمەوە هەندێك سامناكە. لەو هوتێلە گەورەیەدا كاتێك هەموو ژوورەكان چۆڵن و كارەبای نیشتمانی دەبڕێت، لەو تاریكییەدا لەپڕ زەنگی تەلەفۆن لێدەدات، تەنیا كوڕەكەی هۆڵی پێشوازی تەلەفۆن دەكات و دەڵێت "مامۆستا پێویستت بە كارەبایە؟ موەلیدەت بۆ كارپێبكەین؟" منیش بە شەرمێكەوە دەڵێم بەڵێ. ناهەقی نییە، موەلیدەیەكی گەورە كە بۆ هۆتێلیك دانراوە دەبێ 100 كەسی تێدابێت، ئێستا بۆ یەك میوان دەیخاتەكار، هەر كاژێرێك دەیان لیتر گازوایلی دەوێت.

 

كۆرۆنا زۆربەی كەرتەكانی پەكخستووە، بەتایبەت كەرتی گەشتیاری، لەوكاتەوەی رێوشوێنی بەرنگاربوونەوەی ڤایرۆسی كۆرۆنا دەستیپێكردووە، كەرتی گەشتیاری بەتەواوی پەكیكەوتووە، وەك بەڕێوەبەری گشتی گەشتوگوزای ئەم پارێزگایەی هەفتەیەكە منی لێم گوتی "هیچ گەشتیارێك نەهاتووە".

 

لە پارێزگای دهۆك 824 بنكەی گەشتیاری هەن، (بنكەی گەشتیاری بەهەموو ئەو شوێنانە دەگوترێت كە لەلایەن حكومەتی هەرێمی كوردستانەوە مۆڵەتیان پێدراوە وەك كافتریا، هۆتێل، مۆتێل و ئەوانیدیكە). بەگوێرەی خەمڵاندنێكی گەشتوگوزاری پارێزگای دهۆك تەنیا بنكەكانی گەشتیاری لە ماوەی یەك مانگدا لە 10-03 بۆ 10-04 سێ ملیار و 600 ملیۆن دیناری زیانی داراییان بەركەوتووە.

 

بەگوێرەی ئامارەكانی پێشوو بە تێكڕا مانگانە لەم وەرزەدا زیاتر لە 150 هەزار گەشتیار روویان لە دهۆك كردووە، بەڵام ئەمساڵ و بەدیاریكراوی لەم مانگەدا هیچ گەشتیارێك نەهاتووە.

 

لە ماوەی سێ مانگی كۆتایی 2019 كە وەرزی سەرما و كەمی گەشتیارە، 316 هەزار و 184 گەشتیار روویان لە پارێزگای دهۆك كردبوو، ئەوە جگە لە شاندی دیپلۆماسی، رێكخراوەكان. گەشتیاری ناوخۆیی هەرێمی كوردستان، شۆفێران و ئەوانەش كە لە دەروازەی ئیبراهیم خەلیل هاتوون، هەژمارنەكراون. هەروەها نزیكەی 75%ی ئەو ژمارەیە لە نێوەڕاست و باشووری عێراق هاتوون و. 25%ی گەشتیاری دەرەوەی عێراقن. بەگوێرەی خەمڵاندنێكی دەستەی گشتی گەشتوگوزار ، هەر گەشتیارێك كە تەمەنی گەیشتبێتە 18 ساڵ، رۆژانە نزیكەی 300 دۆلار خەرجدەكات، ئەوە ئەگەر گەشتیارە لە نێوەڕاست و باشووری عێراقەوە بێت، بەڵام گەشتیاری دەرەوەی عێراق رۆژانە 1000 دۆلاریان خەرجدەكرد. بەگوێرەی سێ مانگی كۆتایی ساڵی رابردوو تەنیا پارێزگای دهۆك نزیكەی یەك ملیار و 500 ملیۆن دۆلار زیانی هاتنی گەشتیاری بەركەتووە.

 

ئەو هۆتێلەی منی لێم، نزیكەی 100 ژوور و سویت و سێ ریستۆرانتی هەیە، بەردەوام 45 ژووری پڕبوو لە میوان، هەر میوانێك بە تێكڕا 100 دۆلار خەرجیی هەبوو، هوتێلەكە لەنێوان 75-80 كارمەندی هەبوو، هەر كارمەندێكی بە تێكڕایی 500 دۆلار مووچەی بوو. ئێستا كەمتر لە 10 كارمەندی ماونەتەوە. وەك بەڕێوەبەری گشتی گەشتوگوزاری دهۆك دەڵێت "هوتێلەكان دەرگاكانیان كراوەن بەڵام هیچ گەشتیارێك نییە".

 

ئەوە تەنیا یەك هوتێلە هێندە زیانی بەركەوتووە، لەكاتێكدا لە هەرێمی كوردستان (625 هۆتێل، 370 مۆتێل، 80 گوندی گەشتیاری) هەن.

 

هەرچەندە هێشتا هیچ بڕیارێك لە حكومەتی هەرێمی كوردستان نییە بۆ قەرەبووی زیانەكان یان لێخۆشبوونی باج و رسومات. 

 

ئێستا ئەم هوتێلە پێنج ئەستێرە گەورەیە تەنیا منی تێدام، لە ژووری 114.