ئەشعەرییەکان: هەندێک سەلەفی پەیوەندییان بە ئەهلی سوننە و جەماعەتەوە نییە

 

ماوەیەکە ناکۆکیی نێوان سەلەفی و ئەشعەرییەکان قووڵتر بووەتەوە، تاوەکو ئەو جێگەیەی کە یەکدی بە "کافر" دەناسێنن. 

 

مامۆستا سەرباز محەممەد، مامۆستای ئایینی و کەسایەتی دیاری ئەشعەرییەکان دەڵێت: ئومەی ئیسلامی یەکدەنگن لەسەر چوار مەزهەبی فیقهی ئەحناف، شافیعی، مالیکی، حەنبەلی و لە رووی فیقهەوە دابەشبوون بەسەر ئەو چوار مەزهەبەدا.

 

ئەشعەرییەت، وەک مامۆستا سەرباز محەممەد دەڵێت، "واتا ئەهلی سوننە و جەماعەت، بەڵام هەندێک لەوانەی بانگەشەی سەلەفییەت دەکەن هیچ پەیوەندییەکیان بە ئەهلی سوننە و جەماعەتەوە نییە." 

 

رۆژی سێشەممەی رابردوو یەکێتیی زانایانی ئایینی ئیسلامی کوردستان لە راگەیێندراوێکدا گوتی، "لە رێگەی گوتاری هەینی و چەند گرتەیەکی ڤیدیۆیی لەلایەن چەند کەسێک گوایە خۆیان بە سەلەفی لە قەڵەم داوە، هێرشی ناڕەوایان کردە سەر گەورە زانایانی ئیسلام و سووکایەتی زۆریان بەرامبەر هەردوو رێڕەو و پەیڕەوانی ئیمامی ئەشعەری و ماتوریدی بە تایبەت ئیمام ئەبوو حەسەنی ئەشعەری هەڵڕشت." 

 

پێشتر لە بەرنامەی 'رووداوی ئەمڕۆ'دا د. عەبدوللەتیف سەلەفی، رێبەری سەلەفییەکانی هەرێمی کوردستان گوتبووی:  ''من کارم بە ئەشعەری و ماتوریدی نییە، بەڵکو کارم بە چوارچێوەی قورئانە، هەر کەسێک دەست بە قورئان و حەدیسەوە بگرێت، ئەوە ئەهلی هیدایەتە، بەپێچەوانەکەشی ئەوە گومڕاییە.''

 

بەگوتەی رێبەری سەلەفییەکانی هەرێمی کوردستان، "گومڕایی لەگەڵ کافربوون جیاوازە و هەموو بیدعەیەک (داهێنان) لە دیندا گومڕاییە، چونکە گومڕا واتا ئەو کەسەی کە لە رێگەی راست لایداوە.''