دوای سووریا و لوبنان عێراق دەکەوێتە سەر نەخشەی گۆڕانکارییەکانی ناوچەکە

 

 

حوسێن سەلامە، نووسەر و لێکۆڵینڤانی لوبنانی لە بەرنامەی رووداوی ئەمڕۆ گوتی: هەڵبژاردنی سەرۆک دوای دوو ساڵ قەیران، سەرکەوتنە بۆ لوبنان و عەون بەڵێنی زۆری بە گەلی لوبنان داوە بەڵام باسی کۆکردنەوەی چەکی نەکرد.

 

گوتیشی: جۆزێف عەون و سوپای لوبنان ئامادەنین رووبەڕووی حیزبوڵڵا ببنەوە.

 

بە گوتەی سەلامە بە چوار رۆژ ئیسرائیل سووریای وێران کرد و دەڵێت: عێراق و یەمەن و لوبنان وەکو سووریایان بەسەردێت بە دەستی ئیسرائیل.

 

هاوکات د. پەروێز رەحيم، پسپۆڕی پەیوەندییە سیاسییەکان لەبارەی هەڵبژاردنی سەرۆکی نوێی لوبنان و یەکلاییبوونەوەی ناکۆکییەکانی ئەو وڵاتە دوای دوو ساڵ قەیران گوتی: جۆزێف عەون بەشێکە لە ستراتیژی نوێی ئیسرائیل لە ناوچەکە.

 

گوتیشی: سوپای لوبنان سوپایەکی زۆر لاوازە و فەرەنسا و ئەمریکا خۆراک و مووچەیان بۆ دابیندەکەن.

 

بە گوتەی د. پەروێز رەحيم، ئێران نەیتوانی هیچ بۆ دۆست و هاوپەیمانەکانی بکات لە گۆڕانکارییەکانی ناوچەکە و گوتیشی: ئەمریکا نایەوێت سەقامگیریی عێراق تێکبچێت و حیزبوڵڵا ئێستا هەمان حیزبوڵڵای پێش هێرشەکانی 7ی ئۆکتۆبەری 2023 نییە.

 

هەر لە بەرنامەی رووداوی ئەمڕۆ، د. نەبەز نەوزاد، مامۆستای زانکۆ گوتی: حکومەتی عێراق بە جیدی لە لایەن ئەمریکاوە ئاگەدارکراوەتەوە.

 

گوتیشی: حەشدی شەعبی هەمان هەڕەشەی حوسییەکانی لەسەرە و کەوتنی سووریا کەوتن و لاوازبوونی حیزبوڵڵایە لە لوبنان هەربۆیە ئێستا حەشدی شەعبی لە قەبارەی مەترسییەکان تێگەیشتووە و هێرشەکانی دژی ئیسرائیل راگرتووە.