هێشتا ماویەتی؛ هێزی کورد لە بەغدا

بۆ تۆمارکردنی ئەلقەیەکی نوێ بەڕنامەی "هێشتا ماویەتی" چووینە بەغدا. 1٪ی خاکی عێراقە و 23٪ی دانیشتووانی عێراق لەو شارە دەژین. بەغداد پایتەختێکە ئێستا حوکمی موتڵەقی کەوتووەتە دەستی لایەنی شیعە. حوکمی شیعە بەهێز بووە.
لە دوای 2003 کورد لە بەغدا، سەرۆک و سەرۆک وەزیری دادەنا و لایدەدا و ئەوەی بە دڵی کورد بوو، ئەو دەبووە سەرۆکوەزیر. ویستم بزانم ئێستا "هێزی کورد لەبەغدا" چەند ماوە؟. خەڵکی بەغدا چۆن سەیری کورد دەکەن؟ بەغدا بە خۆی لە چ دۆخێک و قوناخێکدایە؟
 
وەڵامی ئەو سێ پرسیارە دوای بەدواداچوون و قسەکردن لەگەڵ بەرپرس و خەڵکی بەغدا لەم بەرنامەیەدا وەرمگرت، کە:
لەسەر هێزی کورد لەبەغدا، گریمانەیەکمان دانا، ئەگەر هێزی کورد لە دوای 2003 لە بەغدا 100 خاڵی هەبووبێ، ئێستا بووەتە چەند؟ وەڵامەکە ئاسان نەبوو. چوومە ناوچەی قادسییە، لەوێ بەرپرسی باڵای عێراق نیشتەجێن و بڕیار لەسەر هەموو عێراق ئامادە دەکەن و جێبەجێشی دەکەن. کاتێ بەدوای وەڵامی پرسیاری هێزی کورددا دەگەڕام لە قادسییە، وەڵامەکە هەبوو.
وەزیرێکی کورد کە لە دوای 2003ێیەوە لەبەغدایە و پلە وپۆستی زۆری بە ناوی کوردی وەرگرتووە، کاتێک لێم پرسی کورد چەند هێزی ماوە؟ بێ دەنگی هەڵبژارد و لە مێشکی خۆیدا لێکدانەوەی کرد، وەڵامەکە رەنگە بە دڵی کوردەکان نەبێت، بەس ئەو دانی پێدانا گوتی "ئێستا هێزی کورد لە بەغدا تەنیا 35٪ی ماوە و 65٪ی لەدەست داوە". وەڵامی ئەو زیاتر ناخوش بوو بو کوردەکان کاتێک گوتی "هێزی کورد لە 35٪ی نەوەستاوە، بەڵکو لە نەزیف دایە و زیاتر کەم دەبێت". بو رێگریگرتن لە کەمبوونی هێزی کورد لە بەغدا، بەرپرسە کوردەکە لە بەغدا دەڵێت "ئەگەر واز بهێنین لە دەستکاریکردن لە عەدادی شیعە، دەوەستێت، ئەگەر نا نەک هێزی کورد هەر کەمتر دەبێ، بەڵکو شیعە هێز بەکاردەهێنن بو راگرتنی کورد".
 
دەربارەی پرسیاری دووەم کە خەڵکی بەغدا چۆن سەیری کورد دەکەن، دوو بۆچوونی جیاواز هەبوو، هەبوو پێیانوابوو، کورد برای ئەوانن و کێشەیان نییە، هەبوو دەیانگوت، "هەموو کورد باش نین، چونکە دوژمنی یەکدین".
 
بەغدا بووەتە یەک کلیک
 
پاریزگاری بەغدا، لە ئوفیسی باڵەخانەی پارێزگای بەغدا لەسەر پردی سنەک لەلای کەرخ 80٪ی بەغدای دەبینیت، لە رێگەی دانانی زیاتر لە 1200 کامیرای چاودێری لەنێو بەغدا، ئەو گوتی، پلانمان هەیە ژمارەی کامیراکانی چاودێری لەبەغدا بگەینێنە پێنج هەزار کامیرا و لە ئوفیسی خۆم کام شوێنی بەغدا بمەوێ، بەیەک کلیک دەبینم". ئەو راپۆرتی نێودەوڵەتی لەبەردەست بوو لەسەر پێشکەوتنی بەغدا لە ساڵەکانی داهاتووی نێزیکدا و گوتی "بەغدا زۆرترین و گەورەترین گەشەی بە خۆیەوە دەبینێت لە ناوچەکەدا".