پێکهێنانی ژیانی هاوژینی لە نێوان هاونیشتمانیانی پارچەکانی کوردستان

پێکهێنانی ژیانی هاوژینی لە نێوان هاونیشتمانیانی پارچەکانی کوردستان
لە بەرنامەی ئەمجارەی گفتوگۆی کچان باسی پێکهێنانی ژیانی هاوژینی و تێکەڵاوی لە نێوان هاونیشتمانیانی پارچەکانی کوردستان دەکرێ. نڤار و شەیما، بنەوش و بەهرە لە بەرنامەکەدا خاتوو زۆزان چەتین دەکەن کە هاونیشتمانی باکووری کوردستانە و لەگەڵ هاونیشتمانییەکی رۆژهەڵاتی کوردستان هاوسەرگیریی کردووە و بەیەکەوە لە باشووری کوردستان دەژین. لە بەرنامەکەدا پێشکەشکاران لەگەڵ میوانەکەیان باسی ئەو تێکەڵاوییە دەکەن و تیشک دەخەنە سەر ئەو لایەنە جوانەی باشووری کوردستان کە چۆن بووەتە شوێنی کۆبوونەوە و ژیانی هاونیشتمانیانی پارچەکانی دیکە. زۆزان چەتین ماوەی حەوت ساڵە لە باشووری کوردستان لەگەڵ هاوژینە رۆژهەڵاتییەکەی دەژی، باسی دڵگەرمی و باوەشکراوەیی خەڵکی باشووری کوردستان دەکات، بۆ ئەوەش بەسەرهاتێکی خۆی و هاوژینەکەی لەگەڵ ئەو شۆفێری تەکسییە دەگێڕێتەوە کە لە رۆژی مارەبڕینیان لەگەڵیدا سەرکەوتوون بۆ ئەوەی بیانگەیێنێتە دادگە بۆ واژۆکردنی گرێبەستی هاوسەرگیریی لەبەردەم دادوەر.

بە بڕوای زۆزان ئەو دڵگەرمی و هاوڕێیەتییەی هاونیشتمانیانی باشووری کوردستان وایکردووە کە هەرگیز هەست بەوە نەکات کە لە زێدی خۆی دوورە و دەڵێت ئێستا هاوڕێی وای هەیە کە جێگەی خوشک و برای بۆ گرتووەتەوە. زۆزان چەتین هونەرمەندێکی میوزیکژەن و گۆرانیبێژە و لەبەرنامەکەدا لەگەڵ ژەنینی گیتار گۆرانییەکیش دەڵێت.