هونەرمەند ناسر رەزازی - بەشی یەکەم
03:15
ناسر رەزازی: ماوەی 44 ساڵە شاری سنەم نەبینیوە
07:30
ناسر رەزازی: لە سووریا و تورکیا و عێراق و ئێران زیندان کراوم
11:30
ناسر رەزازی: من شاگردی شاگردی حەسەن زیرەکم
18:15
ناسر رەزازی: شانازیی ئەوەم هەیە لەگەڵ محەممەد ماملێ سێ جار گۆرانیم گوتووە
چل و چوار ساڵە سنەی زێدی خۆی نەبینیوە، بۆیە ئومێد دەكات باڵۆنەكە بڕوات تاوەكو ئاویاری شاری سنە نەوستێ. ژیانێکی پڕ لە ئازار بەشی ئەم هونەرمەندە بووە تاوەكو دەگاتە ئەوە كە بڵێ "لەدوای حەسەن زیرەك كەس بە هێندەی من بەدبەختی و چارەڕەشی نەچێشتووە". ناسر رەزازی لە نێو گفتوگۆی باڵۆندا باسی وێستگەكانی ژیانی و گەورە هونەرمەدانی كورد و چەندین پرسی جیاواز دەكات.
ئەو لە 21 ساڵی تەمەنیدا یەكەمین ئاواز و هۆنراوەی تایبەت بە گۆرانی داناوە، گۆرانی (جا چۆن نەگریم نەناڵێنم) كە هونەرمەند لەیلای فەریقی گوتوویەتی یەكەمین ئاواز و هۆنراوەی ئەو گەورە هونەرمەندەی كورد بووە. دواتر وەكو خۆی ئاماژەی پێدەكات بە گۆرانی شێوازی گەڕیان و كاریگەری گۆرانییەكانی برایانی زێ زێ دەستی بە گۆرانی گوتن كردووە.
لە تەمەنی 17 ساڵیدا، حەسەن زیرەكی گەورە هونەرمەندی كورد لە بۆنەیەكدا دەبینی، بەڵام لەو بینینەی پەشیمانە و دەڵێت "حەسەن زیرەكم لە حاڵێكی زۆر ناخۆشدا بینی، كاتێك بینیم زۆر نەخۆش بوو". ناسری رەزایی بە شانازییەكی زۆرەوە باس لەوە دەكات كە لەگەڵ محەممەدی ماملێ لە سێ دانیشتنی جیاوازدا پێكەوە گۆرانییان گوتووە. جگەلەوە لەگەڵ تاهیر تۆفیق و عەلی مەردان و عەزیز شارۆخی و حەمەجەزاش گۆرانی گوتووە. رەزایی ئەوەش دەخاتەڕوو تاوەكو ئێستا پێنج بەرگی بیرەوەییەكانی نووسیوەتەوە، هاوكات باسی كەسایەتیەكیش دەكات كە هێندەی خۆی شارەزایی گۆرانییەكانیەتی و دەڵێت "جەمالی دەلاك لەخۆم زیاتر زانیاری لەسەر گۆرانییەكانم هەیە."
بەبڕوای ئەو هونەرمەندە، خەڵكی كوردستان هێشتا گەورە هونەرمەندی وەكو سەید عەلی ئەزغەریان بەباشی نەناسیوە، ئەو دەڵێت "هێشتا خەڵك لە گەورەیی ئەو هونەرمەندە تێنەگەیشتوون، بەڕاستی وەكو ئەوەی هەیە نەناسراوە."
ناسری رەزازی دەیگێڕێتەوە زیندانی هەر چوار پارچەكەی كوردستانی بینیوە. باسی رووداوێك دەكات كە دوای ئاهەنگێڕانێك لە باكووری كوردستان دەستگیركراوە "نەگبەتی لەوەدا بوو كاتێك گیرام زۆرم برسی بوو ماوەیەكی زۆریش هیچیان پێنەدانین، ئەوەش گرفتێكی دیكە بوو بۆ من لەسەر‌و هەموو ئەوانەش زۆر ئەزیەتیان دام".
سەبارەت بە گوتنەوەی گۆرانی هونەرمەندانی دیكە بە كارێكی خراپی نازانێ بەتایبەت بۆ خۆدی خۆی، چونكە وەكو خۆی باسی دەكات گۆرانی هەر هونەرمەندێكی گوتبێتەوە بە جۆرێكی وەها باش خوێندویەتی جێپەنجەی خۆی بەسەرەوە جێهێشتووە.
هەر لە بەشێكی دیكەی گفتوگۆی باڵۆندا، ناسڕی رەزازی باسی چۆنێتی نەخۆشكەوتنی حەسەن زیرەكی هونەرمەند دەكات و لەو بڕوایەدایە ئەو هونەرمەندە دەرمان خوارد كرا بێت و هەر ئەوەش هۆكاری مردنەكەی بێت "لە ئاهەنگێكدا لە بانە حەسەن زیرەك سوپێك و قەنداخێك دەخوات، دوای ئەوە نەخۆش دەكەوێت ئیتر چاكنابێتەوە".
به‌شی بكه لە
