عەدنان کەریم – بەشی دووەم
"گۆرانی خۆم هەیە ئێستا ناتوانم بە هەمان تۆن بیڵێمەوە" لە پاش ئە رەستەیە، هونەرمەند عەدنان کەریم كەمێك بێدەنگ بوو، لە رووخساریدا دیاربوو گوزەری بەنێو یادەوەرییەكانی تەمەنیدا دەكرد، بۆیە دەستی دایە عودەكەی بە ئاوازێكی خەمگین گۆرانی دەفتەری سینەمی گوت:
لە دەفتەری سینەم دایە سەرجەمی ئاهو ناڵەی دڵ
زامەكانم ئەهەژێنیت دەرونم وا هاتۆتە كوڵ
رەنج سەنگاوی پرسیار لە عەدنان کەریم دەکات بە نیازە تاوەكو كەی گۆرانی بڵێت، لە وەڵامدا عەدنان كەریمی گوتی "لە تەمەنێكدام رەنگە هەر بتوانم 10بۆ 15 ساڵی دیكە گۆرانی بڵێم".
گریان لەكاتی گۆرانی یاخود لەكاتی ئامادەكردنی ئاوازێك بۆ كەسانی هونەرمەند گەیاندنی پەیامێك بووە، ئەم هونەرمەندە كاتێك كاری لەسەر گۆرانی چامەكەی نالی كردووە، ئەو کات نزیكەی 10ساڵ بوو نەهاتبوویەوە بۆ كوردستان بۆیە لەو کاتەدا خۆی خستۆتە شوێنی نالی و هەمان پرسیارەكانی ئەوەی لە بیری خۆیدا دووبارە كردووەتەوە؛ ئەو ماوەیەی كە نەهاتووەتەوە بۆ سلێمانی دەبێت چی گۆڕابێت؟ عەدنان کەریم دەڵێت "لەكاتی ئامادەكردنی گۆرانی چامەكەی نالی هەندێجار دەگریام، چونكە هەمان پرسیارەكانی ئەو شاعیرە گەورەی كوردم لە هەستی خۆمدا دووبارە دەكردەوە".
نەك لە كاتی ئامادەكردنی گۆرانی، بەڵكو جار هەبووە لەكاتی كۆنسێرتیش هەمان هەستی گریانی بۆ دروستبووە "جار هەبووە لەسەر شانۆ لەبەر گریان گۆرانیم بۆ نەگووتراوە".
كاتی دانانی ئاوازی گۆرانییەك لەلای هەر هونەرمەندێك تایبەتمەندی خۆی هەیە، هەندێك پێیان وایە هونەرمەند پێویستی بە كەشێكی هێمنە، بۆچوونی پێچەوانەی ئەوەش هەیە، لای عەدنان كەریم پێچەوانەكەی دروستە، چونكە هونەرمەند دەتوانێ لەنێو قەرباڵغیشدا دنیایەكی جیاوازتر و هێمن بۆ خۆی دروست بكات و دەڵێت "ئاوازی گۆرانی وەرە مەیگێڕی مامۆستا هێمنم لەنێو قەرەباڵغی ماڵەوە داناوە."
گۆرانی (شەوی تاریك و بێدەنگی) كە ساڵی 1983 گوتوویەتی، یەكێك بوو لەو گۆرانیانەی كە سەرەتا عەدنان كەریمی زیاتر پێناسێنرا، بەڵام ئەو كاتە، ئەوەی نەزانیوە كە ئاوازی گۆرانیەكە هی هونەمەندی كۆچكردوو تاهیری خەلیلی بوو "دوای ئەوەی كە زانیم ئاوازەكە هی ئەوە پێمگوت، ئەوەم نەزانیوە، ئەویش بە ئاسایی وەریگرتوو تەنانەت كۆچكردوو تاهیری خەلیلی پێی گوتم (شەوی تاریكی و بێدەنگیت) لە منخۆشتر گوتووەتەوە".
زانینی مەقامە جیاوازەكان بۆ هونەمەند پێویستییە، لەلای ئەو مەقامی (بەیات و حیجاز) خۆشترینە و مەقامی حیجازیش بە زۆر خەمگین ناو دەبات و دەشڵێت "مەقامی سەبا هەر چەندە بە مەقامێكی عەرەبی ناسراوە، بەڵام كە گوێ لە عەلی مەردان دەگری دەزانی چەند جوانی گوتووە".
هێشتا هونەرمەندی كۆچكردوو عەلی مەردان، بۆ عەدانا كەریم قوتابخانەیە و وەكو خۆی باسی دەكات لە رێگەی گوێگرتن لە گۆرانییەكانی رۆژانە شتی نوێی لێ فێردەبێت.
به‌شی بكه لە
