فیچەر - ژنێکی تەمەن 70 ساڵ جلوبەرگی منداڵان دروستدەکات

کوبرا ژنێکی تەمەن 70 ساڵی شاری مەهابادە لە رۆژهەڵاتی کوردستان. ئەو لە گوندی دارەلەکی سەر بەو شارە لەدایکبووە، بەڵام دوای ماوەیەک ماڵیان دەهێننە مەهاباد و لەوێ نیشتەجێ دەبن.
کوبرا لە تەمەنی 13 ساڵی لەلایەن دایکییەوە فێری کاری رستن و چنین دەبێت. لەوکاتەوە تاوەکو ئێستاش لەسەر کارەکانی بەردەوامە.
کوبرا دەڵێ ''دایکم منی فێرکرد، منیش زۆر کچی مەهابادم فێرکرد، بەڵام کچەکانی خۆم حەزیان بە کارەکە نەبوو بۆیە فەرنەبوون''.

کوبرا، بەلەکپێچ، بلووز، گۆرەوی، کڵاو و جلوبەرگی منداڵان لە سووف و خوری دروستدەکات. ئەو دایکی 4 کوڕ و 4 کچە، جلوبەرگی بۆ منداڵەکانی دروستکردووە، هەروەها بە داهاتی کارەکانی هاوکاری هاوژینەکەی کردووە بۆ ژیانی رۆژانە.

کوبرا هەفتانە جارێک بەرهەمە دەستکردەکانی دەباتە بازاڕ و دەیانفرۆشێ هەندێکیش بە هەدییە دەداتە هاوڕێ و خزم و ناسیاوانی. خود کوبرا ئێستا لەگەل بیلالی کوڕی دەژی. بیلال دەڵێ ''هەموو زەحمەتییەکانی ژیانمان لەسەر شانی دایکم بوو، ئێستاش من زەحمەتییەکانی ئەو دەکێشم و تاوەکو مابم خزمەتی دەکەم''.