فیچەر - ئەسمەر حەمیدی لە هەولێر چالاکی هونەری دەکات

ئەسمەر حەمیدی، کچە هونەرمەندێکی دیاری خۆراسانە و لە هەولێر درێژە بە کاروچالاکییە هونەرییەکانی دەدات. ئەسمەر لە ساڵی 1995ی زایینی لە شاری سمڵقانی خۆراسان لە دایکبووەو کوردی کورمانجی خۆراسانە. لە ساڵی 2019 دەستی بە گۆرانیگوتن کردووەو لەگەڵ گۆرانیشدا خوێندنی کوردی شێوەزاری کورمانجی خوێندووە.

ئەسمەر حەمیدی دەڵێ ''مۆسیقای فۆلکلۆر، ئەو مۆسیقا رەسەنەی ئێمە بووە کە دایکان و باوکانمان لەگەڵی ژیاون. ئێستا مۆسیقای پۆپ خەریکە شوێنی دەگرێتەوە لەنێو گەنجاندا."

عەلی رەزا سپاهی لاین، نووسەر و رۆژنامەوان و لێکۆلەری کوردی خۆراسان لەبارەی ئەسمەر حەمیدییەوە دەڵێ "هاوڕێیەکم دەنگێکی بۆ ناردم و گوتی؛ ئەمە خوشکێکی کوردمانە لە باکووری خۆراسان، دەنگێکی خۆشی هەیە. ئەگەر بتوانی هەڵبەستێکی بۆ بنووسی بۆ گۆرانییەکی، دەتوانێت کاریگەرییەکی گەورە لەسەر کوردانی خۆراسان و بە تایبەت لەسەر دەنگبێژانی گەنجی بەرەی نوێی ئەو ناوچەیە دابنێت. لەو کاتەدا بوو کە ئەو هەڵبەستی کوردی خۆراسانەم نووسی. هەڵبەت ئاوازەکەی لەسەر ئاوازێکی شەهریبانی کوردە''.

دوای بڵاوکردنەوەی گۆرانی کوردی خۆراسانم، ئەسمەر حەمیدی دەنگی بە تەواوی پارچەکانی کوردستاندا بڵاوبووەوەو لە تۆڕە کۆمەڵایەتییەکانیش دەنگدانەوەی زۆری هەبوو.