دەنگی من - گوڵزار حەمەفەرەج ، چالاکڤان- سلێمانی

گلەیی زۆر لای دەنگدەری ژن هەیە کە ئەوان ئەگەر لە نیوەی کۆی دەنگدەری هەرێمی کوردستان زیاتر نەبن رەنگە نیوە بن، بەڵام تائێستا ژمارەیەک لە بەربژێرانی ژن بە سستمی کۆتا کورسی پەرلەمان مسۆگەر دەکەن.

 

لە سەر ئەم بابەتە زۆرن ئەو چالاکڤانانەی ژن توێژینەوەی زانستی و بە دواداچوونیان کردووەو بە دەرەنجامی جیاوازیش گەیشتوون، یەکێک لەو ژنانەی دەمێکە سەر قاڵی ئەم بابەتەیە گوڵزاری چالاکڤانی مافی ژنە لە سلێمانی و میوانی بەرنامەی دەنگی من بووەو بە وردی باسی هۆکارەکانی دەکات.

 

ئەو چالاکڤانە پێیوایە لە ماوەی دە ساڵی رابردوودا ژن زیرەکترانەو بوێرانەتر هاتووەتە نێو گۆڕەپانی سیاسی و رەنگە بۆ یەک دەیەی دیکەش ئەوەی ئێستا هەیە نەمێنێت و باس و خواسێک لە سەر کورسی کۆتای ژن نەمێنێت.

 

ئەو داواکار بوو لەم خولەی پەرلەمان ئەو ژنانەی دەبنە ئەندامی پەرلەمانی کوردستان چوار ساڵی گرنگ لە بەر دەستیاندایە بۆ کارکردن لە سەر ماف و ئەرکەکانی ژن بە گشتی و رەخساندنی دەرفەت بۆ هاتنە پێشەوەی ژنان و دروستکردنی ژنی سەرکردە.