فوئاد حوسێن: یەکەم هەڕەشە لەسەر کیانی هەرێمی کوردستان لە ناوخۆیدایە

فوئاد حوسێن: یەکەم هەڕەشە لەسەر کیانی هەرێمی کوردستان لە ناوخۆیدایە

وەزیری دەرەوەی عێراق پەیوەندیی نێوان حکومەتی هەرێمی کوردستان و حکومەتی فیدراڵیی عێراق بە باش ناودەبات
 
فوئاد حوسێن، وەزیری دەرەوەی عێراق لە میانی بەشداریکردنی لە بەرنامەی بێستوون تۆکی تۆڕی میدیایی رووداو کە بێستوون عوسمان پێشکێشی دەکات، لەبارەی پەیوەندییەکانی نێوان هەولێر و بەغدا و کاریگەریی کێشەکانی پارتی و یەکێتی لەسەر ئەو پەیوەندییانە، مەترسییەکانی سەر قەوارەی هەرێمی کوردستان، هەوڵەکانی تایبەت بە ئامادەکردنی یاسای نەوت و گاز و چەندین بابەتی دیکە قسەی کرد.

لە بەرنامەکەدا دەیان خوێندکاری زانکۆکانی هەرێمی کوردستان ئامادەبوون و چەندین پرسیاریان ئاراستەی وەزیری دەرەوەی عێراق کرد. 
 
پەیوەندی هەولێر و بەغدا
 
وەزیری دەرەوەی عێراق پەیوەندیی نێوان هەولێر و بەغدا بە باش وەسف دەکات و هۆکارەکەشی دەگەڕێنتەوە بۆ ئەوەی گفتوگۆ و دانوستاندنی بەردەوام لە نێوانیاندا هەیە و دەشڵێت، "بەڵام ئەگەر بڵێم کێشەیان لە نێواندا نییە، هەڵەیە، چونکە کێشە هەیە و لەگەڵ هەبوونی کێشەش، رێگە هەیە بۆ چارەسەرکردنیان".
 
فوئاد حوسێن لە بەرنامەکەدا گوتی، "لە بودجەی 2019 دا پێشمەرگە وەک بەشێک لە سیستمی بەرگریی عێراق باسکراوە؛ لە بودجەی ئێستای عێراقیشدا ئاماژەی پێدراوە و پارەشی بۆ تەرخانکراوە؛ بۆیە دەشێ بڵێین ئەم پرسە چارەسەرکراوە، بەڵام کێشە لەسەر ژمارەی پێشمەرگە هەیە، چونکە بەگوێرەی ئەو ژمارەیەی وەزارەتی پێشمەرگە رایگەیاندووە، ئەو ژمارەیەی لە بودجەی عێراقدا ئاماژەی پێدراوە دروست نییە".
 
وەزیری دەرەوەی عێراق باس لەوە دەکات کە لە بودجەی ئەمساڵدا بەم شێوەیە شایستە داراییەکانی وەزارەتی پێشمەرگە جێگیرکراوە کە ئەمەش لە نێوەڕۆکدا هەنگاوێکی باشە، بەڵام بۆ ساڵانی داهاتوو دەبێت ژمارەکە بگۆڕدرێت و بە شێوەیەکی دروست لە بودجەدا جێگیر بکرێت.
 
قەوارەی هەرێمی کوردستان
 
فوئاد حوسێن پێیوایە لە بەغداوە مەترسی بۆسەر قەوارەی هەرێمی کوردستان نییە و بە بۆچوونی ئەو سیاسەتمەدارە "ئەگەر مەترسییەک لەسەر قەوارەی هەرێمی کوردستان هەبێت، لە ناوەوەی هەرێمی کوردستانە".
 
وەزیری دەرەوەی عێراق گوتی، "ئێستە هیچکەس وەکو سەردەمی سەدام حوسێن هێرش ناکاتە سەر کوردستان و ئەو سەردەمە چوو، بەڵام هەڕەشە لەسەر کیانی هەرێمی کوردستان کاتێکە دۆخی یاسادانان، ئابووری و سیاسیی ناوخۆ تێکبچێت، واتە من هەڕەشەیەک لە بەغداوە نابینم و تەنانەت پەیوەندییەکانیش باشن"؛ دووپاتی لەوەش کردەوە؛ "یەکەم هەڕەشە لەسەر کیانی هەرێمی کوردستان لە ناوخۆیدایە، بۆ ئەوەش دەبێ لە ناوخۆ دابنیشین و بەیەکەوە ئەم هەڕەشەیە نەهێڵین".
 
لەبارەی ئەو لایەنانەی لە عێراق هەوڵ بۆ لاوازکردن و لێدان لە قەوارەی هەرێمی کوردستان دەدەن، فوئاد حوسێن گوتی، "بەغدا تەنیا یەک لایەن نییە؛ لەوێ حکومەت، حیزب و کەسایەتی هەن؛ راستە لە بەغدا خەڵک هەیە نایانەوێت کیانی هەرێمی کوردستان بەم شێوەیە بەردەوام بێت، بەڵام ئەو کەسانە کەمن و زۆربەی هەرە زۆری ئەوانی دیکە پابەندی دەستوورن و ئەوەش بە واتای پابەندبوونە بە کیانی فیدراڵیی هەرێمی کوردستانەوە".
 
فەرمانگەی پەیوەندییەکانی دەرەوە
 
لە میدیاکان باس لەوە دەکرێت کە هەوڵێک هەیە بۆ ئەوەی لە دادگەی فیدراڵیی عێراق سکاڵا لە دژی فەرمانگەی پەیوەندییەکانی دەرەوەی هەرێمی کوردستان بکرێت و وەزیری دەرەوەی عێراقیش دەڵێت، "نەمبیستووە سکاڵایەکی لەو شێوەیە تۆمارکرابێت، بەڵام دوور نییە هەوڵی کەسی یان حیزبی هەبێت بۆ ئەمە."
 
بە گوتەی فوئاد حوسێن، "خەڵک هەیە دەیەوێت قەوارەی هەرێمی کوردستان پووچەڵ بکاتەوە و ئەگەر سکاڵایەکی لەم شێوەیە بچێتە دادگەی فیدراڵی، دیار نییە چ بڕیارێکی دەبێت، بەڵام ئەوەش پەیوەندی بە ناوخۆی هەرێمی کوردستانەوە هەیە. چەندە لە نێوخۆماندا کێشەمان هەبێت، راستەوخۆ لە بەغدا رەنگدانەوەی دەبێت".
 
وەک وەزیری دەرەوەی عێراق ئاماژەی پێدەدات، "بەپێی دەستووری عێراق، هەرێمی کوردستان دەتوانێت پەیوەندی فەرهەنگی و بازرگانی لەگەڵ دنیای دەرەوە هەبێت و بۆ ئەمەش دەتوانێت نوێنەری هەبێت، بەڵام گرنگە هاوئاهەنگی نێوان وەزارەتی دەرەوەی عێراق و نوێنەرانی هەرێمی کوردستان هەبێت کە تاوەکو ئێستا بەباشی لێی نەکۆڵراوەتەوە و کاتی ئەوە هاتووە ئەو پەیوەندییانە رێکبخەینەوە".
 
فوئاد حوسێن پێیوایە، "تاوەکو ئێستا پەیوەندییەکانی هەرێمی کوردستان لەڕووی پەیوەندی و دارایییەوە کێشەیان هەیە و تەنانەت کێشەی ئەوەشیان هەیە کە ئایا نوێنەری دیپلۆماسین یان نا، وا باشە هاوئاهەنگییەک بکەین و لە چوارچێوەی دەستووردا بگەینە رێککەوتنێک بۆ ئەوەی بزانین پێگەی نوێنەری هەرێمی کوردستان لە دەرەوە دەبێ چۆن بێت. پێش ساڵی 2003 و گۆڕانی رژێم لە عێراق، هەرێمی کوردستان نوێنەری لە دەرەوەی وڵات هەبوو و ئێستا کاتی ئەوە هاتووە بە هاوئاهەنگی لەگەڵ بەغدا رێکبخرێتەوە".
گشتپرسی بۆ سەربەخۆیی
 
لە  ئەیلوولی 2017 لە باشووری کوردستان گشتپرسی بۆ بڕیاردان لە سەربەخۆیی بەڕێوەچوو. فوئاد حوسێن دەڵێت، "ئێمە ئەو گشتپرسییەمان بۆ ئەوە کرد بۆچوونی خەڵک وەربگرین، بەڵام کاردانەوەی وڵاتانی ناوچەکە و جیهان پێی گوتین "گۆڕینی نەخشە لەم ناوچەیەدا بە ئاسانی ناکرێت".
 
وەزیری دەرەوەی عێراق گوتی، "پێش رووخانی رژێمی بەعس، پەرلەمانی کوردستان لە ئۆتۆنۆمییەوە دەنگی بە فیدراڵی دا و لە ساڵی 2003ش لایەنە سیاسییەکانی هەرێمی کوردستان ستراتیژییان بۆ فیدراڵی هەبوو و خەڵکیش هەمووی بەمە رازی بوون، چونکە ئەو گۆڕانەی لە عێراق روویدا هیوای بە هەموو خەڵک بەخشی کە بەرەو دیموکراسی و سیستمی فیدراڵی هەنگاو دەنێت".
 
فوئاد حوسێن دەڵێت، "لە ئەنجامی هەوڵی سیاسی هەموو لایەنەکان، دەستووری عێراق نووسرایەوە. ئەگەر دەستوور وەک خۆی جێبەجێبکرێت، زۆربەی کێشەکان بە پرسی نەتەوەیی کوردیشەوە لە عێراق چارەسەر دەبن، بەڵام کێشە ئەوەیە کە هێندە پابەندی دەستوور نەبوون و کۆمەڵێک مادەی دەستووری وەرنەگێردراوەتە سەر یاسا. لە عێراق دەستوور فیدراڵییە، بەڵام یاساکان کۆنن و یاسای سیستمێکی ناوەندیین".
 
بە گوتەی وەزیری دەرەوەی عێراق، "پرسی دامەزراندنی دەوڵەتی کوردستان تەنیا پەیوەست نییە بە عێراقەوە و ریفراندۆمیش ئەوەی سەلماند. ئێمە بۆ ئەوە ریفراندۆممان نەکرد دەوڵەت رابگەیەنین، بەڵکو ئەو ریفراندۆمە تەعبیرێک بوو و دەنگی بۆ درا و کاردانەوەی دەوڵەتانی دراوسێ و دنیای لێکەوتەوە. ئەوەش پێی گوتین گۆڕینی نەخشە لەم ناوچەیە بە ئاسانی ناکرێت؛ بۆیە لەم پرسەدا پێویستە واقیعی بین".
 
ئازادیی رادەربڕین
 
زۆربەی حیزبە دەسەڵاتدارەکانی عێراق پێشتر ئۆپۆزیسیۆنی حکومەت بوون و رەخنەی ئەوەیان لێ دەگیرێت کاتێک دەسەڵاتیان گرتووەتە دەست، لە ستەملێکراوەوە بوون بە ستەمکار. فوئاد حوسێن بە هەڵەی دەزانێت ئەم پێناسەیە گشتگیر بکرێت و دەڵیت، "کەسانێک هەن کە رەنگە ئەو کات ستەمی زۆریان بینیبێت و هەوڵی تۆڵەکردنەوە بدەن، بەڵام هەموو سیاسییەکان بەم شێوەیە نین و ئێستا دۆخەکە لەچاو پێشوو زۆر گۆڕاوە".
وەزیری دەرەوەی عێراق باسی لەوە کرد کە "لە سەردەمی رژێمی بەعسدا خەڵک هەبووە لەسەر نامەیەک کە لە دەرەوە بۆی هاتووە لە سێدارە دراوە. ئەو کاتە ئازادی رادەربڕین نەبوو؛ هەناسەی سیاسی لە عێراقدا نەبوو، بەڵام ئێستا دۆخەکە زۆر گۆڕاوە و تەنانەت ئازادی تا رادەیەک هەیە کە هەندێکجار دەگاتە فەوزا".
 
فوئاد حوسێن دەڵێت، "سیستمێک کە دیکتاتۆری بێت و مۆنۆپۆڵی لەسەر فیکر و سیاسەت هەبێت، جیاوازە لەوەی رووداوێکی دەگمەن لە وڵاتێکدا رووبدات. ئەم ئایدیۆلۆژییە لە سیستمی سیاسی ئێستای عێراقدا نییە. پێشتر عێراق ئایدیۆلۆژیەکی هەبوو دژی دیموکراسی، ئازادی و مافی مرۆڤ بوو، کاتێکیش بەرەنگاری دەبوویەوە دەیکوشتی، تەنانەت ئەوەی بیریشی دەکردەوە لە سێدارە دەدرا، بەڵام ئێستا سیستمەکە بەم شێوەیە نییە" و دەشڵێت، "لەو دۆخە ئاڵۆزەی کە ئێستا تێی کەوتووین کەس هەیە تیرۆر دەکرێت و دەکوژرێت، ئەوە بەو مانایە نییە کۆی سیستمەکە بەم شێوەیە، بەڵکو ئەمە دیاردەیەکی دەگمەنە".

ئابووریی عێراق و وەبەرهێنانی دەرەکی
 
وەزیری دەرەوەی عێراق سێ مەرج بۆ راکێشانی وەبەرهێنی بیانی بۆ عێراق دادەنێت و یاسا لە سەرووی مەرجەکان دادەنێت و رایدەگەیەنێت، "راکێشانی وەبەرهێنەری دەرەکی پێویستی بە یاسای نوێ، دۆخی سیاسی و ئەمنییەوە هەیە. لە عێراق یاساکان کۆنن و هەندێکیان هی سەردەمی مەلیکین. ئەو یاسایانە لەگەڵ سەردەمدا ناگونجێن و دەبێ بەرەو بازاڕی ئازاد و پشتگیری کەرتی تایبەتیان ببەین".
 
فوئاد حوسێن دەڵیت، "ئابووری عێراق زیاتر لە 90٪ـی پشت بە داهاتی نەوت بەستووە. داهات و پیشەسازیی نەوت لای حکومەتە و نەدراوەتە کەرتی تایبەت. ئەوە کێشەیە تۆ باسی بازاڕی جێگرەوە و ئابوورییەکی نوێ بکەیت، بەڵام ئابوورییەکە لەلایەن حکومەتەوە ئیدارە بکرێت".

وەزیری دەرەوەی عێراق روونیدەکاتەوە کە "پرسی وەبەرهێنان پەیوەندی بە یاساوە هەیە. یاساکان چەندە لیبراڵتر بن ئەوەندە راکێشانی وەبەرهێنەر لە دەرەوە ئاسانتر دەبێت؛ هاوکات پرسی تەناهیش یەکێکی دیکە لە مەرجەکانە. سەرمایە هەمیشە ترسنۆکە و دۆخی ئارامی دەوێت. ئەگەر دۆخی وڵات ئارام نەبوو، بۆچی سەرمایەدار لە ئەوروپا و کەنداوەوە بێت و لە عێراق وەبەرهێنان بکات؟"
 
بە گوتەی فوئاد حوسێن، "عێراق توانای ئەوەی هەیە ببێتە یەک لە وڵاتە دەوڵەمەندەکانی ناوچە و وەبەرهێنەری دەرەکیش رابکێشێت. ئێستا ئابووری عێراق پشتی بە نەوت بەستووە و بەشی 100 بۆ 150 ساڵ نەوتی یەدەگی هەیە؛ لە داهاتووشدا دەبێتە دەوڵەتێکی بەرهەمهێنەر لە بواری گازدا".
 
ئەو سیاسەتمەدارە کوردە کە پێشتر وەزیری دارایی عێراق بوو، دووپاتیدەکاتەوە کە "گازی عێراق زیاتر لە 70 ساڵە لە کێڵگەکانی نەوت دەسووتێنرێت و بەفیڕۆ دەچێت. ئێستا لەم کابینەیەی حکومەتی عێراقدا لەگەڵ کۆمپانیای تۆتاڵ گرێبەستمان کردووە ئەو گازی هاوەڵە لە نەوتەکە جیا بکاتەوە؛ لەگەڵ ئەوەش کێڵگەی گازی گەورە لە عێراقدا هەیە و لە ماوەی سێ تا چوار ساڵی دیکە عێراق دەبێتە وڵاتێکی بەرهەمهێنەری گاز".
 
وەبەرهێنان لە گازی عێراقدا
 
وەزیری دەرەوەی عێراق ئاماژە بە گرێبەستێک بە بەهای 27 ملیار دۆلار لەگەڵ کۆمپانیای تۆتاڵ ئینێرجی دەکات بۆ ئەوەی وەبەرهێنان لە کێڵگە گازییەکانی عێراقدا بکات و لە وڵاتێکی هاوردەکاری گازەوە ببێت بە وڵاتێکی هەناردەکار.
 
فوئاد حوسێن دەڵێت، "بۆ بەرهەمهێنانی  43٪ـی کارەبا، عێراق پشتی بە هاوردەکردنی گاز لە ئێران بەستووە. ناوچەی خانەقین و دیالە بەتەواوەتی پشتیان بە گازی ئێران بەستووە بۆ بەرهەمهێنانی کارەبا و سێ وێستگەی گرنگی دیکەی کارەبای عێراقیش گازیان لە ئێرانەوە بۆ دابیندەکرێت، ئەوەش بەو واتایەیە کە 43٪ـی کارەبای عێراق لە ئێرانەوە هاوردە دەکرێت. ئەگەر ئێران هەناردەی گازەکەی رابگرێت، هەشت بۆ نۆ کاژێر لە کارەبای عێراق کەمدەبێتەوە".
 
وەزیری دەرەوەی عێراق رایگەیاند، "کاتێک بڕیارماندا پشت بە گازی خۆمان ببەستین و وەبەرهێنان لەو کەرتەدا بکەین، کۆمپانیای تۆتاڵ ئێنێرجی هاتە پێشەوە و لە حکومەتی مستەفا کازمی دانوستانەکان دەستیان پێکرد، بەڵام هەندێک کێشەی تێکەوت. ئێستا ئەو کێشانە چارەسەر بوون. کۆمپانیای تۆتاڵ لە بواری بەرهەمهێنانی گاز، هەم گازی هاوەڵ و هەم کێڵگە گازەکان لە عێراقدا دەستبەکار دەبێت".
 
بە گوتەی فوئاد حوسێن، "یەک لە گەورەترین کێڵگە گازییەکانی عێراق لە دیالە و نزیک خانەقینە، کێڵگەیەکی گازی گەورەی دیکەش لە ئەنبارە. گرێبەستەکە بە جۆرێکە کە پشکێکی داهاتەکە بۆ عێراق و پشکێک بۆ تۆتاڵ ئێنێرجییە و هەندێک کۆمپانیای قەتەری و ئەمریکیش پشکیان تێیدا هەیە. بەهای گرێبەستەکە 27 ملیار دۆلارە".
 
یاسای نەوت و گاز
 
لەکاتی پێکهێنانی حکومەتی عێراق یەک لەو بڕگانەی رێککەوتنی لەسەر کرا، نووسینەوەی یاسای نەوت و گازی عێراقە و فوئاد حوسێن هۆکاری دواکەوتنەکەی بۆ پەسندکردنی بودجەی عێراق دەگەڕێنێتەوە.
 
وەزیری دەرەوەی عێراق دەڵێت، "لەو رێککەوتنەی لەگەڵ هێزە سیاسییەکانی عێراق بۆ پێکهێنانی حکومەت واژۆمان کرد، چەند یاسامان دانابوو کە لەپێشینەبوون. یەک لەوانە تێپەڕاندنی یاسای بودجە بوو و دووەمیان یاسای نەوت و گاز و دواتر ئەنجوومەنی فیدراڵییە و دواتر یاساکانی دیکە. لە یاسای بودجە تەواوبووین و ئێستا پێویستە سەرقاڵی یاسای نەوت و گاز بین و دانوستانیش دەستپێدەکات بۆ نووسینەوەی ئەم یاسایە".
 
پشکی هەرێمی کوردستان لە بودجەی عێراق
 
وەزیری دەرەوەی عێراق پێیوایە "ئەوەی لە بودجەی عێراقدا بۆ هەرێمی کوردستان تەرخانکراوە هەموو داواکارییەکانی کورد نییە، بەڵام کەمیش نییە، بەڵام ئەگەر ململانێی هێزە سیاسییەکانی هەرێمی کوردستان نەبوایە زۆر لەوە زیاترمان دەستدەکەوت".
فوئاد حەسێن دەڵێت، "هەندێک کەس باس لەوە دەکات کە بودجەی عێراق کۆمەڵێک مینی بۆ هەرێمی کوردستان تێدا چێنراوە، بەڵام من وای نابینم. بودجە وەکو هەموو تێکستێکی دیکە توانای ئەوەی تێدایە شرۆڤەی جیاوازی بۆ بکرێت".

پەیوەندی پارتی و یەکێتی

پەیوەندی پارتی و یەکێتی لە دۆخێکی هەستیاردایە و لەسەر کۆمەڵێک پرسی تایبەت بە هەرێمی کوردستان ناکۆکییان هەیە.  فوئاد حوسێن پێیوایە کە "پارتی و یەکێتی لە قۆناخی جیاوازدا دژی یەک و هاوکاری یەکتریش بوون. لە قۆناخی ئێستادا خەریکە دەگەین بە رێککەوتن. مەرجیش نییە هەرچی کێشە هەیە چارەسەر بکرێت. هەندێک جار کە قەیرانێک دروستدەبێت، ئەو قەیرانە چارەسەر دەکرێت یان سڕی دەکەیت و یانیش ئیدارەی دەکەیت. دەبێ لە قۆناخی ئێستادا ئیدارەی ئەم قەیرانە بکەین کە لە نێوان پارتی و یەکێتیدا هەیە".
 
فوئاد حوسێن باسی لەوەکرد کە لە هەوڵەکانیان بۆ چەسپاندنی مافەکانی هەرێمی کوردستان لە یاسای بودجەی عێراق، لایەنە کوردستانییەکان لە بەغدا بە بەردەوامی لە ماڵەکەی کۆدەبوونەوە و رێنمایی پێدەدان؛ وەکو ئاماژەشی پێدەدات، "هەفتەیەک بەر لە پەسندکردنی بودجە، ئەو کۆبوونەوانە کێشەیان تێکەوت. پێش ئەو کێشەیە خەڵک هەبوون دەیانەویست لەمپەر بخەنە بەر مافەکانمان لە بودجە و نەیاندەتوانی، بەڵام کاتێک کێشە کەوتە نێوان خۆمان، کارەکەیان بۆ ئاسان بوو".
فوئاد حوسێن گوتی، "وەکو وەزیری دەرەوەی عێراق، ئەگەر بمەوێ لە بەغدا بەرگری لە مافەکانی هەرێمی کوردستان بکەم، کارەکەم ئاسانتر دەبێت کە لە هەرێمی کوردستان لایەنەکان یەکەڵوێست بن".
 
هەڵبژاردنی ئەنجوومەنی پارێزگای کەرکووک

بڕیارە 18ـی کانوونی یەکەمی ئەمساڵ هەڵبژاردنی ئەنجوومەنی پارێزگاکانی عێراق بە کەرکووکیشەوە بکرێت و فوئاد حوسێن دەڵێت، "کەرکووک هەڵبژاردنێکی گرنگی لەبەردەمە. لە ماوەی رابردوودا ئەو پارێزگایە و سەرجەم پارێزگاکانی دیکەی عێراق لە دۆخێکی ناتەندروستدا بوون. سڕکردنی ئەنجوومەنی پارێزگاکان کێشەیەکی گەورەی بۆ پرسی دیموکراسی لە عێراق دروستکرد، لەبەر ئەوەی ئەنجوومەنی پارێزگا نەما چاودێری پارێزگار بکات".
 
وەزیری دەرەوەی عێراق دەشڵێت، " دۆخی کەرکووک لە پارێزگاکانی دیکە خراپتر بووە، لەبەر ئەوەی پارێزگاری نەبوو. لەم هەڵبژاردنەدا هیوادارم ئەنجوومەنێکی نوێ لە کەرکووک دروستبێت. بۆ ئەو هەڵبژاردنەش مەرج نییە پارتی و یەکێتی بە یەک لیست بەشدار بن، بەڵام گرنگە هاوئاهەنگییان هەبێت بۆ دابەشکردنی ناوچەکان تاوەکو دەنگەکان بەفیڕۆ نەچن".
 
رێککەوتن لەگەڵ ئێران
 
ئێران و عێراق چەندین جار لەبارەی هێزەکانی رۆژهەڵاتی کوردستان لەهەرێمی کوردستان کۆبوونەتەوە. وەزیری دەرەوەی عێراق دەڵێت، " هێزێکی سیاسی کە پەناهەندەیە، نابێت چەکدار بێت و ئەمەش بنەمایەکی دەستوورییە و ناتوانین پێوەی پابەند نەبین".

فوئاد حوسێن گوتی، "کاتێک بۆردوومانی ماڵی شێخ باز کرا، چەند جارێک چوومە ئێران و لەگەڵ سەرکردەکانی ئەو وڵاتە دانوستاندنم کرد و ئەنجامەکەشی ئەوەبوو کە ماوەیەکە بۆردوومانەکان راگیراون. ئێستا رێککەوتنێکی ئەمنی لەنێوان عێراق و ئێران هەیە و بۆچوونی هەرێمی کوردستانیشی تێدا وەرگیراوە".
 
مادەی 140 و قەرەبووکردنەوەی کوردی فەیلی
 
یەک لەو رێککەوتنانەی لە هاوپەیمانیی بەڕێوەبردنی دەوڵەت بۆ پێکهێنانی حکومەت واژۆی لەسەرکراوە، پابەندبوون و جێبەجێکردنی مادەی 140ـە.  فوئاد حوسێن دەڵێت، "ماوەیەک بوو ئەو پرسە سڕکرابوو و هەر باس نەدەکرا، ئێستا لیژنەیەک لە پەرلەمان دروستبووە بەناوی لیژنەی مادەی 140 و جگە لەمەش لیژنەی مادەی 140 کە پێشتر هەبوو، دەستی بە کارەکانی کردووەتەوە و بودجەش بۆ ئەو مادەیە تەرخانکراوە".

لەبارەی گەڕاندنەوە و قەرەبووکردنەوەی پەنابەرانی کوردی فەیلی لە ئێران، وەزیری دەرەوەی عێراق گوتی، "رەنگە ستەم لە زۆربەی پێکهاتەکانی عێراق کرابێت، بەڵام ئەو ستەمەی لە کوردی فەیلی کراوە زۆر زیاترە. یەکەمجار چەکی کیمیایی لە عێراق لەسەر ئەوان تاقیکرایەوە، کاتێک بە زۆرەملێ گوێزرانەوە، گەنجەکانیان دەستبەسەر کردن و دەست بەسەر خانوو و موڵک و ماڵیاندا گیرا".
 
بە گوتەی فوئاد حوسێن، "هەندێک لە زیانلێکەوتووانی کوردی فەیلی قەرەبوو کراونەتەوە، بەڵام بەس نییە و ئێستاش هەزاران فەیلی هەن لە ئێران منداڵیان گەورە بووە و وەکو پەنابەر دەژین  لەوێش پێیان دەڵێن عەرەب. لەنێو پرۆگرامی حکومەتدا بڕگەیەک لەسەر کوردی فەیلی هەیە بۆ ئەوەی بتوانن مافەکانیان وەربگرنەوە، بەڵام یەک لە کێشەکان ئەوەیە کە کوردە فەیلییەکانیش بەسەر حیزبی جۆراوجۆری کوردی و شیعەدا دابەشبوون".