سێ منداڵی دەستگێڕێک لە کۆیە بەهۆی کەمدەرامەتییەوە لە خوێندن دابڕاون

بەختیار رەحمان، دەڵێت، بەهۆی کەمدەرامەتییەوە نەیتوانیوە سەردانی پزیشک بکات و تەنانەت توانای نییە دەرمانەکانیشی بکڕێ.

بەپێی راپۆرتی پزیشکی، بەختیار پێویستی بە چارەسەریی بەردەوام و هاوکاریکردن هەیە. دکتۆر ئازاد حەسەن، پسپۆڕی نەخۆشییەکانی مێشک و دەمار، گوتی: "پێویستە بەختیار دەرمانەکانی بە رێکی بەکاربهێنێ و بە رێکی سەردانی پزیشک بکات. کارکردنی لەبەر هەتاو مەترسی لەسەر ژیانی دروستدەکات."

رێزان محەممەد، هاوژینی بەختیارە، رۆژانە لەگەڵی دەچێتە سەر کار بۆ ئەوەی چاودێریی نەخۆشییەکەی بکات. رێزان دەڵێت: "هیچ مووچەیەکمان نییە. سێ منداڵم بەهۆی کەمدەرامەتییەوە لە خوێندن دابڕاون. من، دوو کچم و هاوژینم نەخۆشین و پێویستمان بە هاوکارییە."