رووداو دیجیتاڵ
میدیای فەرمیی تورکیا بە پشتبەستن بە زانیاریی سەرچاوە ئەمنییە باڵاکانی وڵاتەکە بڵاویکردەوە، تیمی ئۆپەراسیۆنە تایبەتەکانی دەزگای هەواڵگریی نیشتمانیی تورکیا (میت)، لە ئۆپەراسیۆنێکدا بکوژی عوسمان کۆسەیان کردووەتە ئامانج و کوشتوویانە.
عوسمان کۆسە دیپلۆماتی تورکیا بوو لە کۆنسوڵخانەی هەولێر.
بەگوێرەی زانیارییەکانی میدیای فەرمیی تورکیا، جەمیل ئاکار کە ناوی نهێنی "رێناس دێرک"ـە و لەدایکبووی باکووری کوردستانە، یەکێک بووە لەو تیمەی گەریلاکانی پەکەکە کە ساڵی 2019 عوسمان کۆسە دیپلۆماتی تورکیایان لە هەولێر کوشت، لەلایەن میتەوە کراوەتە ئامانج.
هەرچەندە میت ئاماژەی بە رۆژی ئۆپەراسیۆنەکە نەکردووە، بەڵام میدیای فەرمیی ئەم وڵاتە ئەمڕۆ یەکشەممە، 31ـی کانوونی یەکەمی 2023، بە ئامانجکردنی رێناس دێرکی لە هەرێمی کوردستان بڵاوکردەوە.
ناوەندی چاپەمەنی و راگەیاندنی هێزەکانی پاراستنی گەل - هەپەگە، هیچ روونکردنەوەیەکی لەبارەی بە ئامانجکردنی رێناس دێرکی نەداوە.
عوسمان کۆسە دیپلۆماتی تورک و کارمەندی کۆنسوڵخانەی تورکیا بوو لە هەولێر. رۆژی 17ـی تەممووزی 2019 لە رووداوێکی تەقەکردن لە رێستۆرانتی هوقەباز لە شاری هەولێر لەگەڵ دوو هاونیشتمانیی هەرێمی کوردستان بە ناوەکانی (عوسمان محەممەد عەلی) و (بەشدار رەمەزان ساڵح) کوژران.
رۆژی 5ـی تەممووزی 2023، دەزگای هەواڵگریی نیشتمانی تورکیا - میت لە ئۆپەراسیۆنێکدا لە پارێزگای سلێمانی لە هەرێمی کوردستان کەسێكی بە ناوی جەلال کایا کردووەتە ئامانج، کە بەگوتەی خۆیان بەرپرسی هەواڵگریی پەکەکە بووە لە عێراق و پلانداڕێژەری ئەو هێرشە بووە، کە عوسمان کۆسە، دیپلۆماتکاری تورکیای تێیدا کوژرا.
چەند رۆژێک دوای رووداوەکە و 26ـی تەمموزی 2019، ئەنجوومەنی ئاسایشی هەرێمی کوردستان لە راگەیێندراوێکدا رایگەیاند، "شەش کەس لە پەیوەند بەم رووداوەدا دەستگیرکران کە سێ کەس هاووڵاتی تورکیان لە نێویاندا ئەنجامدەری سەرەکی رووداوەکە بەناوی (مەزڵوم داغ). سێ کەسیش لە هاوکار و یاریدەدەرانی ئەنجامدەرانی رووداوەکە هاووڵاتی هەرێمی کوردستانن".
رۆژی 10-02-2020، دادگای دووی تاوانی هەولێر سزای بەسەر شەش کەسدا سەپاند، دوو تۆمەتبار سزای لەسێدارەدانیان بۆ دەرچووە بەناوەکانی عەبدولڕەحمان ئەر و مەزڵووم داغ، تۆمەتبارێکی دیکە ساڵێک زیندانی و سێ کەسی دیکە سزای دوو ساڵ زیندانییان بەسەردا سەپێنراوە.
ساڵی رابردوو، تیمی ئۆپەراسیۆنە تایبەتەکانی دەزگای هەواڵگریی نیشتمانیی (میت)، 69 ئۆپەراسیۆنیان لە باشوور و رۆژئاوای کوردستان کردووە. لە ئەنجامدا 82 کەس کرانە ئامانج کە 23 کەسیان بەرپرسی باڵا بوون و 42 کەس دەستگیرکراون و گواستراونەتەوە تورکیا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ