رووداو دیجیتاڵ
لە ئۆپەراسیۆنێکدا کە لە یەک کاتدا لە 37 پارێزگای تورکیا و باکووری کوردستان بەڕێوەچوو، 189 کەس بە گومانی ئەندامبوونیان لە رێکخراوی داعش دەستگیرکران.
بەیانی ئەمڕۆ شەممە، 30ـی کانوونی یەکەمی 2023، عەلی یەرلیکایا لە هەژماری تایبەتی خۆی لە تۆڕی ئێکس، دەستپێکردنی ئۆپەراسیۆنێکی هاوکات لە 37 پارێزگای تورکیا و باکووری کوردستان لە دژی شانە نهێنییەکانی داعش بڵاوکردەوە و رایگەیاند، 189 گومانلێکراو دەستگیرکراون.
وەک لە راگەیێندراوەکەی وەزیری ناوخۆی تورکیادا هاتووە، لە کۆی 189 گومانلێکراوەکە، 34یان لە پارێزگاکانی وان، ئامەد، چەولیگ، دیلۆک، سێرت، مێردین، ئەرزەڕۆم و ئێلیهـ لە باکووری کوردستان دەستگیرکراون.
باس لەوەشکراوە، لە کاتی پشکنینی ناونیشانی گومانلێکراوەکان، دەست بەسەر ژمارەیەکی زۆر بەڵگەنامەی دیجیتاڵی و چەکی بێمۆڵەت و چەندین بڵاوکراوەی داعشدا گیراوە.
ئەوە لەکاتێکدایە، لە ئۆپەراسیۆنێكی هاوبەشی دەزگای هەواڵگری میت و ئاسایشی تورکیا، کە رۆژی هەینی لە نۆ پارێزگای وڵاتەکە بەڕێوەچوو، 32 ئەندام و بەرپرسی داعش دەستگیرکران، کە بەپێی میدیای فەرمیی تورکیا، پلانیان هەبوو لە سەری ساڵدا هێرش بکەنە سەر پەرستگەی جووەکان، کەنیسەی مەسیحییەکان و باڵیۆزخانەی عێراق لە ئەنقەرە.
پێشتر، هێزە ئەمنییەکانی تورکیا لە ئۆپەراسیۆنێکدا کە لە پارێزگای یۆزگات بەڕێوەچوو، پێنج هاووڵاتیی عێراقییان بە تۆمەتی ئەندامیێتی داعش دەستگیرکرد.
ئۆپەراسیۆنەکە رۆژی پێنجشەممە، 28ـی کانوونی یەکەمی 2023، لەسەر راسپاردەی داواکاری گشتیی یۆزگات دەستیپێکرد، دوای ئەوەی بە تۆمەتی ئەندامیێتیی داعش فەرمانی گرتنی بۆ پێنج هاووڵاتیی عێراقی دەرکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ