رووداو دیجیتاڵ
سەرۆکی پارتی وەتەن دەڵێت، یەکگرتوویی تورکیا، ئێران، عێراق، سووریا و رووسیا رێگریان کرد لە دامەزراندنی دەوڵەتی کوردستان لە رێگەی گشتپرسییەکەی 2017دا.
رۆژی 26ـی کانوونی یەکەمی 2023، وەزارەتی دەرەوەی ئێران لە تاران کۆنفرانسێکی راوێژکاری سیاسیی باڵای تایبەت بە پرسی فەلەستین و دۆخی کەرتی غەززە بە ئامادەبوونی ژمارەیەک سەرکردەی لایەنە سیاسییە جیهانییەکان رێکخست. لە تورکیا، دۆغو پەرینچەک، سەرۆکی پارتی وەتەن تێیدا بەشدار بوو و گوتارێکی پێشکێش کرد.
دۆغو پەرینچەک، بەگشتیی باسی لە "پیلانگێڕی" ئەمریکا و ئیسرائیل کرد و بە گشتپرسیی سەربەخۆیی کوردستان گرێیدا کە رۆژی 25ـی ئەیلوولی 2017 کرا. پەرینچەک "دەوڵەتی کوردستان"ی بە ئیسرائیلی دووەم ناوبرد.
دۆغو پەرینچەک لەبارەی گشتپرسی سەربەخۆیی کوردستان گوتی، "یەکگرتوویی تورکیا، ئێران، عێراق، سووریا و رووسیا رێگریکرد لە دامەزراندنی دووەمین دەوڵەتی ئیسرائیل بەناوی (دەوڵەتی کوردستان) کە ویستیان لە رێگەی گشتپرسییەکەی 2017 دایمەزرێنن. بەمەش مۆدێلێکی نوێی ئاشتی پێکهێندرا. لەو کاتەدا من لە تاران بووم و کاری هاوبەشمان لەگەڵ بەڕێز عەلی ئەکبەر ویلایەتی زۆر بەرهەمدار بوو. ئەو مۆدێلە نوێیەی ئاشتی ئەمڕۆش بەدی دەکرێت".
پەرینچەک رۆژی 15ـی نیسانی 2021، لە هەڤپەیڤینێکی تایبەتی لەگەڵ راوین ستێرک پەیامنێری تۆڕی میدیایی رووداو، لەبارە گشتپرسی سەربەخۆیی کوردستان گوتبووی، "بڕیاری گشتپرسیی بڕیارێکی هەڵەیە، بەڵام ئەگەر خودی عێراق رەوای ببینێت، ئێمەش رێزی لێدەگرین".
هەروەها رۆژی 18ـی ئابی 2022، دڵبخوێن دارا بێژەری تۆڕی میدیایی رووداو لەبارەی پێکهێنانی قەوارەی رۆژئاوای کوردستان لە سووریا پرسیاری لە دۆغو پەرینچەک کردبوو، کە ئایا دژایەتی ئەو قەوارەیە دەکەن؟ دۆغو پەرینچەک لە وەڵامدا گوتبووی، "بۆچی دژایەتی بکەین؟ ئەگەر دەوڵەتی سووریا ئەم قەوارەیە بە رەوا بزانێت و دانی پێدا بنێت، ئێمە بۆچی دژایەتیی بکەین. بەپێچەوانەوە رێز لە ئیرادەی گەلی سووریا دەگرین".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ