رووداو دیجیتاڵ
لە ئاهەنگێکی بووکگواستنەوە لە ناوچەی ئەسەنیوڕتی زۆرینە کوردنیشینی ئیستەنبووڵ، 15 کەس لە بەشداربووان بە تۆمەتی بانگەشەکردن بۆ پارتی کرێکارانی کوردستان (پەکەکە) دەستگیرکران.
پۆلیس و تیمەکانی هەواڵگری ئۆپەراسیۆنێکیان بۆ سەر ئەو بەشداربووانە دەستپێکرد کە گرتەی ڤیدیۆییان لە تۆڕە کۆمەڵایەتییەکاندا بڵاوکرابووەوە.
گوایە ئەوان بانگەشەیان بۆ پەکەکە کردووە.
ئاهەنگەکە لە ناوچەی ئەسەنیوڕت بەڕێوەچووە و دواتریش گرتەی ڤیدیۆیی لە تۆڕە کۆمەڵایەتییەکاندا بڵاوکراوەتەوە. بەگوێرەی راپۆرتی پۆلیس، لەو ئاهەنگەدا گۆرانیی تایبەت بە عەبدوڵڵا ئۆجەلان و پەکەکە لێدراوە و شایی لەگەڵ دا کراوە.
پۆلیس لە ناوچەکانی غازی ئەسەنیوڕت، عوسمان پاشا و ئارناڤوتکۆی ئەو 15 کەسەیان دەستگیرکرد و لێکۆڵینەوە لەگەڵیاندا دەستیپێکردووە.
دەستگیرکردنی ئەو 15 کەسە تەنیا رووداو نییە، لە رۆژی 21ـی ئەم مانگەش نۆ گەنجی دیکە کە لە کەناراوێکی مێرسینی تورکیا لەکاتی شایی و هەڵپەڕکێدا درووشمی "بژی سەرۆک ئاپۆ"یان گوتبووەوە، دەستگیرکران. ئەو بابەتەش لە تورکیا بووەتە رۆژەڤ و کاردانەوەی جۆراوجۆری بەدوای خۆیدا هێناوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ