رووداو دیجیتاڵ
سەرۆککۆماری تورکیا پەیامی ئاساییکردنەوەی پەیوەندییەکان لەگەڵ سووریا بەشێوەیەکی راستەوخۆ بڵاوکردەوە و رایگەیاند، هیچ هۆکارێک نییە رێگر بێت بۆ سەرلەنوێ بونیاتنانەوەی پەیوەندییەکان لەگەڵ سووریا.
لە دوای نوێژی هەینی لە ئیستەنبووڵ، رەجەب تەیب ئەردۆغان بۆ رۆژنامەڤانان دوا و وەڵامی پرسیارەکانی دانەوە. لە وەڵامی پرسیاری "بەشار ئەسەد لە دیداری لەگەڵ نوێنەری سەرۆکی رووسیا تیشکی خستبووە سەر پەیوەندییەکان لەگەڵ تورکیا و رایگەیاندبوو، دەرگایان کراوەیە بۆ هەموو پێشهاتێک و چاوخشاندن بە پەیوەندییەکان لەگەڵ ئەنقەرە بە مەرجی رێزگرتن لە سەروەری سووریا، ئێوە چۆن هەڵسەنگاندن بۆ قسەکانی ئەسەد دەکەن؟".
لە وەڵامدا رەجەب تەیب ئەردۆغان گوتی، "هیچ هۆکارێک نییە رێگر بێت بۆ سەرلەنوێ بونیاتنانەوەی پەیوەندییەکان لەگەڵ سووریا. وەک چۆن لە رابردوودا پێکەوە لەگەڵ سووریا پەرەمان بە پەیوەندییەکان دا، بەهەمان شێوە بەیەکەوە کار بۆ پەرەپێدانیشی دەکەین".
لەبارەی رێزگرتن لە سەروەریی خاکی سووریا، ئەردۆغان ئەوەشی گوت، "هەرگیز پلان و ئامانجمان نییە و نەبووە دەست لە کاروباری ناوخۆی سووریا وەربدەین، چونکە گەلی سووریا برای ئێمەن و کۆمەڵگەکانمان پێکەوە دەژین. هەر لە رابردوودا ئێوەش دەزانن پەیوەندییەکانمان لەگەڵ سووریا زۆر زۆر زیندوو راگرتبوو، تەنانەت کۆبوونەوە و دیداری خێزانیشمان لەگەڵ بەڕێز ئەسەد هەبوو. بۆیە شتێک نییە بگوترێت سبەی روونادات، بێگومان روودەدات. هەرگیز ئامانجمان نەبووە دەست لە کاروباری ناوخۆی سووریا وەربدەین".
لە دوای سەرهەڵدانی قەیرانی سووریا لە ساڵی 2011، تورکیا سەرجەم پەیوەندییەکانی لەگەڵ دیمەشق پچڕاند، بەڵام لە ساڵی 2021، تورکیا دەستی بە هەوڵەکان بۆ ئاساییکردنەوەی پەیوەندییەکانی لەگەڵ دیمەشق کردەوە. لە تشرینی یەکەمی 2021 وەزیرانی دەرەوەی تورکیا و سووریا لە بولگاریا کۆبوونەوە. لە مانگی ئەیلوولیش بە سەرپەرشتیی وەزیری بەرگریی رووسیا، هەردوو وەزیرانی بەرگریی تورکیا و سووریا لە مۆسکۆ کۆبوونەوە.
رۆژی 14ـی مانگ، وەزارەتی ناوخۆی تورکیا، ئاماری کۆچبەر و پەناخوازە سووریاییە نیشتەجێبووەکان لە تورکیا و باکووری کوردستان بڵاوکردەوە و رایگەیاند، ژمارەیان 3 ملیۆن و 113 هەزار و 478 سووریایین. 1 ملیۆن و 125 هەزار و 623 کەسیان مافی نیشتەجێبوونیان هەیە و 234 هەزار و 528 کەسیان لەژێر پاراستنی کاتیی لەلایەن نەتەوە یەکگرتووەکانەوە لە تورکیا نیشتەجێن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ