چەکی دەستبەسەرداگیراو.
رووداو دیجیتاڵ
وەزیری ناوخۆی تورکیا دەڵێت، هێزە ئەمنییەکانی وڵاتەکەی لە باکووری کوردستان و تورکیا دەستیان بەسەر 951 چەکی بێ مۆڵەتدا گرتووە.
عەلی یەرلیکا، وەزیری ناوخۆی تورکیا رایگەیاند، تیمی ئۆپەراسیۆنەکانی سەر بە وەزارەتی ناوخۆی تورکیا بە هاوئاهەنگی لەگەڵ فەرماندەیی هێزەکانی جەندرمە، ئاسایشی گشتی، پۆلیس و دژەتیرۆر، هەڵمەتێکی بەرفراوانیان لە 68 پارێزگای باکووری کوردستان و تورکیا بۆ نەهێشتنی چەکی بێ مۆڵەت بۆ ماوەی چوار رۆژ ئەنجامدا.
عەلی یەرلیکایا گوتی، لە ماوەی ئەو چوار رۆژەدا هەزار و 129 گومانلێکراو دەستگیرکران و دەستبەسەر 951 چەکی بێ مۆڵەتیشدا گیرا کە 803 دەمانچە، 20 کڵاشینکۆف و 128 تاپڕ بوون.
بە گوێرەی ئامارە فەرمییەکان، لە باکووری کوردستان و تورکیادا 36 ملیۆن چەکی کەسی هەیە؛ تەنیا چوار ملیۆن چەک مۆڵەتیان هەیە و 32 ملیۆنیان بێ مۆڵەتن.
ئایهان ئاکجان، ئەندامی دەستەی دامەزرێنەرانی دەزگای ئوموت کە دەزگاکەی بەدواداچوون بۆ چەکی بێ مۆڵەت دەکات و راپۆرتەکانی تایبەتن بە بەرەنگاربوونەوەی تووندوتیژی و کەمکردنەوەی چەک لە دەستی خەڵک دەڵێت، "بەرامبەر هەر چەکێکی بە مۆڵەت، نۆ چەکی بێ مۆڵەت هەیە. ئەمەش بەو مانایە دێت لە هەر سێ ماڵدا یەکێکیان چەکی هەیە".
دەزگای ئوموت هۆشداری لە زیادبوونی ژمارەی چەک لە باکووری کوردستان و تورکیا دەدات و دەڵێت، رۆژانە 10 کەس گیانلەدەستدەدەن و 20ی دیکەش بریندار دەبن.
بەگوێرەی راپۆرتی ساڵی 2022ی دەزگای ئوموت، ساڵی رابردوو لە سێ هەزار و 984 رووداودا لە باکووری کوردستان و تورکیا چەک بەکارهێندراوە و لە ئەنجامدا دوو هەزار و 278 کەس کوژراون و چوار هەزار و 231 کەسی دیکەش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ