رووداو دیجیتاڵ
وەزیری ناوخۆی تورکیا دەڵێت، لە 9 رۆژی پشووی جەژنی قورباندا 72 کەس لە باکووری کوردستان و تورکیا بە رووداوی هاتووچۆ گیانیان لەدەستداوە و 12 هەزار و 274 کەسیش بریندار بوون.
عەلی یەرلیکایا، وەزیری ناوخۆی تورکیا رۆژی سێشەممە 25ی حوزەیران، ئاماری رووداوەکانی هاتووچۆی 9 رۆژی پشووی جەژنی قوربانی بڵاوکردەوە و رایگەیاند، لە باکووری کوردستان و تورکیادا حەوت هەزار و 216 رووداوی هاتووچۆ روویانداوە و بەو هۆیەوە 72 کەس گیانیان لەدەستداوە و 12 هەزار و 274 کەسی دیکەش برینداربوون.
وەزیری ناوخۆی تورکیا دەڵێت، لەو رۆژانەدا 21 ملیۆن و 67 هەزار و 377 ئۆتۆمبێل لە رێگەی نێوان شارەکاندا هاتوچۆیان کردووە. ئەو ژمارەیە بەراورد بە هاتوچۆی نۆ رۆژی پشووی جەژنی رەمەزان بە رێژەی 87.5٪ زیادیکردووە، کە ئەو کاتە 11 ملیۆن و 23 هەزار و 983 ئۆتۆمبێل لە رێگە سەرەکییەکاندا هاتوچۆیان کردبوو.
عەلی یەرلیکایا گوتی، لەو نۆ رۆژەدا سزای پێبژاردن بۆ 519 هەزار و 242 شۆفێر بڕاوەتەوە و کۆی گشتی 20 ملیۆن و 811 هەزار لیرە (نزیکەی 632 هەزار دۆلار) سزای رووداوی هاتووچۆ کۆکراوەتەوە.
لە پشووی جەژنی رەمەزانی ئەم ساڵدا لە باکووری کوردستان و تورکیا چوار هەزار و 998 رووداوی هاتووچۆ روویاندابوو و بەو هۆیەوە 66 کەس گیانیان لەدەستدابوو و هەشت هەزار و 352 کەسی دیکە بریندار ببوون.
لە باکووری کوردستان و تورکیادا پشووی جەژنی قوربان 9 رۆژە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ