رووداو دیجیتاڵ
وەزیری دەرەوەی تورکیا سەردانی واشنتنی پایتەختی ئەمریکا دەکات و لەگەڵ بەرپرسانی باڵای ئەو وڵاتە کۆدەبێتەوە.
وەزارەتی دەرەوەی تورکیا لە تۆڕی کۆمەڵایەتیی ئێکس بڵاویکردەوە، هاکان فیدان، وەزیری دەرەوەی وڵاتەکە لە رۆژانی 25-26ـی ئەم مانگە، بە سەردانێکی فەرمی دەگاتە واشنتنی پایتەختی ئەمریکا و لەگەڵ مارکۆ رۆبیۆ، وەزیری دەرەوەی ئەمریکا و بەرپرسانی باڵای ئەو وڵاتە کۆدەبێتەوە.
بەگوێرەی ئاژانسی فەرمیی تورکیا، لە کۆبوونەوەکاندا وێڕای پەیوەندیی دووقۆڵیی هەردوو وڵات، چەند پرسێکی جیهانی و ناوچەکەش تاوتوێدەکرێن.
هەر بەگوێرەی ئاژانسی فەرمیی وڵاتەکە، بڕیارە شەڕی ئۆکراینا-رووسیا، پرسی غەززە و دوایین پێشهاتەکانی سووریا چەند مژارێکی دیکەی کۆبوونەوەکانی نێوان هەردوولا بن.
ئاژانسی فەرمیی تورکیا دەشڵێت، چاوەڕوان دەکرێت لە کۆبوونەوەکاندا بەرپرسانی باڵای تورکیا و ئەمریکا باسی رێکار و هەنگاوەکان لەبارەی بەڕێوەبەرایەتیی خۆسەر و داعش بکەن.
ئاژانسی فەرمیی تورکیا ئاماژەی بەوەش کرد، چاوەڕوان دەکرێت وەزیری دەرەوەی تورکیا لە کۆبوونەوەکاندا باسی هەڵگرتنی سزاکانی یاسای کاتسا و فرۆشتنی فڕۆکەی F-35 بە تورکیا لەلایەن ئەمریکاوە، بکات.
یاسای کاتسا، "یاسای بەرەنگاربوونەوەی دژایەتیکردنی ئەمریکایە لە رێگەی سەپاندنی سزاوە."
تورکیا لە ساڵی 2019، سیستمی بەرگریی مووشەکی S-400 ـی لە رووسیا کڕی، بەمەش بووە یەکەم وڵاتی ناتۆ کە بە پێی یاسای کاتسا، بە فەرمی سزای بەسەردا سەپێنرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ