یاریدەدەری سەرۆککۆماری تورکیا دەڵێت رێگەی گەشەپێدان سوودی زۆری بۆ باکووری کوردستان دەبێت

 

لە کۆبوونەوەیەکی تایبەت بە رێڕەوەکانی گواستنەوەی تورکیا کە رۆژی (سێشەممە، 24-12-2024)، بەرێوەچوو، جەودەت یڵماز، یاریدەدەری سەرۆککۆماری تورکیا ئاماژەی بە پرۆژەی رێگەی گەشەپێدان کرد کە پلان وایە لە بەسرەوە دەستپێبکات و لە هەرێمی کوردستانەوە بچێتە نێو باکووری کوردستان و تورکیا. 

 

بڕیارە ساڵی 2025، کارەکانی دروستکردنی بەندەری گەورەی فاو تەواو بکرێن و  90 شوێن بۆ لەنگەرکردنی کەشتی لەوێدا دروست بکرێن. 

 

پێشبینی دەکرێت ئەو پڕۆژەیە کات و تێچوو کەم بکاتەوە، ئەوەش بە کورتکردنەوەی مەودای نێوان چین و ئەورووپا، بەراورد بە رێگەی دەریایی کە بە نۆکەندی سوێسدا تێدەپەڕێت.

 

بەرپرسانی تورکیا بەردەوام باس لەو پرۆژەیە دەکەن. ئەیلوولی ئەم ساڵ تورکیا جیدیبوونی خۆی لەسەر پشتیوانیکردنی پرۆژەکە راگەیاند.

 

ھاکان فیدان، وەزیری دەرەوەی تورکیا، رۆژی 13-9-2024 رایگەیاند، عێراق، ئیمارات، تورکیا و قەتەر لە دیدار و کۆبوونەوەی چڕدان لە بارەی پرۆژەی رێگەی گەشەپێدان.