نەتەوە یەکگرتووەکان: سەرکۆنەی هێرشە تیرۆریستییەکەی ئەنقەرە دەکەین

فەرحان حەق، جێگری گوتەبێژی سکرتێری گشتیی نەتەوە یەکگرتووەکان لەبارەی هێرشەکەی نزیک ئەنقەرە گوتی: "سکرتێری گشتیی نەتەوە یەکگرتووەکان هێرشە تیرۆریستییەکەی ئەنقەرە سەرکۆنە دەکات، کە کرایە سەر دامەزراوەی پیشەسازیی بۆشایی ئاسمان و فڕۆکەوانی."

 

رۆژی چوارشەممە 23-10-2024، لە ناوچەی کاهرامانکازان لە نزیک ئەنقەرە هێرشکرایە سەر دامەزراوەی پیشەسازیی بۆشایی ئاسمان و فڕۆکەوانی لە ئەنقەرە. دوای ئەوەی تەقینەوەیەک روویدا، شەڕە تەقە لە نێوان هێزە ئەمنییەکان و هێرشکارەکاندا روویدا. 

 

فەرحان حەق هەروەها گوتی: "سکرتێری گشتیی نەتەوە یەکگرتووەکان سەرەخۆشیی لە قوربانییەکان و خێزانەکانیان دەکات، هەروەها هیوای زوو چاکبوونەوە بۆ بریندارەکان دەکات. نەتەوە یەکگرتووەکان بە هاوسۆزییەوە لەگەڵ خەڵک و حکومەتی کۆماری تورکیا دەوەستێت."

 

عەلی یەرلیکایا، وەزیری ناوخۆی تورکیا لە کۆنفرانسێکی رۆژنامەڤانیدا رایگەیاند، دوای هێرشەکە، هێزی تایبەتی جەندرمە و ئاسایش بەخێرایی ناوچەکەیان گەمارۆدا و زوو هەردوو هێرشکارەکەیان کوشت. ئاماژەی بەوەشکرد، یەکێک لە هێرشکارەکان پیاو و ئەوی دیکەشیان ژن بووە.

 

وەزیری ناوخۆی تورکیا باسی لەوەشکرد، 5 کەس لە هێرشەکەدا کوژران و 22 کەسی دیکەش برینداربوون.

 

کۆمپانیای توساش، کۆمپانیایەکی تایبەت و پشکدارە سەر بە سەرۆکایەتیی پیشەسازیی بەرگریی تورکیایە. سیستمی بۆشایی ئاسمان، مانگی دەستکرد، فڕۆکەی جەنگی بێفڕۆکەوان، فڕۆکەی بێفڕۆکەوان و هێلیکۆپتەر بەرهەم دەهێنێت.