ئەردۆغان لەگەڵ سەرۆكی میت کۆدەبێتەوە
رووداو- ئەنقەرە
بڕیارە ئەمڕۆ کاژێر 15:00 ی دوای نیوەڕۆ رەجەب تەییب ئەردۆغان، سەرۆککۆماری تورکیا لەگەڵ هاکان فیدان، راوژێرکاری دەزگای هەواڵگری میللی (میت) کۆببێتەوە.
ئەو کۆبوونەوەیە دوای ئەو هێرشە هات کە بۆیەكەمجار پێكدادان لەنێوان سوپای توركیا و چەكدارانی داعش روویدا، بەهۆیەوە ئەفسەرێكی سوپای توركیا کوژرا و دوو سەربازیش برینداربوون.
کۆبوونەوەکە تایبەت دەبێت بە قسەکردن لەسەر دوایین پێشهاتەکانی تورکیا، رووداوی کوشتنی ئەفسەرە تورکەکە لەلایەن چەکدارانی داعش، رێککەوتنی ئەمریکا و تورکیا لەبارەی بەکارهێنانی بنکەی ئەنجەرلیک لەلایەن وڵاتانی هاوپەیمانانی دژی داعش و پێکهێنانی "هەرێمی ئارام" لە 90کم لەنێو خاکی سووریا.
پێكدادانەكە كاژێر 04:00 ی ئێوارەی پێنجشەممە 23-7-2015 لەسەر سنووری باكووری كوردستان و سووریا لە پارێزگای كیلیس روویدا.
هاوکات لە ئیستەنبوڵ و 12 شاری دیکەی تورکیا، ئۆپەراسیۆنێک بۆ دەستگیرکردنی ئەندامانی پارتی کرێکارانی کوردستان PKK و ئەندامانی گرووپی داعش ئەنجامدرا و 251 کەس دەستگیکران.
لە سەرلەبەیانی ئەمڕۆ هەینی 24-7-2015 ەوە، هۆبەی بەرەنگاربوونەوەی تیرۆر لە بەڕێوەبەرایەتیی پۆلیسی ئیستەنبوڵ ئۆپەراسیۆنێکی ئەنجامدا و ئۆپەراسیۆنەكەش ناونراوە "ئۆپەراسیۆنی بەرەنگابوونەوەی تیرۆر".
ژمارەیەکی زۆر لە پۆلیس و هێزی تایبەت بەشدارییان لە ئۆپەراسیۆنەکەدا کردووە، لە میدیاكانی تورکیادا بە 5 هەزار پۆلیس و 2 هەزار كارمەندی هێزی تایبەت هەژماركراون، ئەمە جگە لەوەی کە لەڕێگەی هەلیکۆتەرەوە چاودێری بەڕێوەچوونی ئۆپەراسیۆنەکە کراوە.