رووداو دیجیتاڵ
خراپی کەشوهەوا لە بارانبارین و با و بۆرانی ئیستەنبووڵ، کۆمپانیای تورکیش ئێیرلاینز ناچار دەکات 41 گەشتیی ئاسمانی ناوخۆیی و نێودەوڵەتیی هەڵبووەشێنێتەوە.
بەڕێوەبەرایەتیی گشتیی کەشناسیی تورکیا، هۆشداری بڵاوکردەوە لەبارەی خراپی کەشوهەوای ئیستەنبووڵ بۆ رۆژی شەممە 23ـی کانوونی یەکەمی 2023 و رایگەیاند، پلەی گەرمای شارەکە لانیکەم چوار پلە دادەبەزێت و لێزمەباران دەبێت و با بە خێرایی 90-110 کم لە کاژێرێکدا هەڵدەکات.
لەسەر ئەم بنەمایە، شەوی رابردوو، 22ـی کانوونی یەکەمی 2023، کۆمپانیای تورکیش ئێیرلاینز لە ماڵپەڕی فەرمیی خۆی و لە هەژمارەکانی تۆڕە کۆمەڵایەتییەکانیدا، هەڵوەشاندنەوەی 41 گەشتی ئاسمانیی ناوخۆیی و نێودەوڵەتیی لە هەردوو فڕۆکەخانەی ئیستەنبووڵ و سەبیحە گۆکچەن لە ئیستەنبووڵ بڵاوکردەوە.
هەر دوێنێ گەورەشارەوانیی ئیستەنبووڵ، هۆشداری لێزمەباران و لافاوی لە تەواوی شارەکە بڵاوکردەوە. لە راگەیێندراوەکانیدا داوا لە دانیشتووانی ئیستەنبووڵ دەکات، لە ماڵەکانیاندا بمێننەوە و لە ئەگەری هەر رووداوێکی نەخوازراودا پەیوەندیی بە هێڵە گەرمەکان بکەن.
دەزگای ئافاد بە پشتبەستن بەپێشبینییەکانی بەڕێوەبەرایەتیی گشتیی کەشناسیی تورکیا، ئامادەباشیی خۆی راگەیاندووە بە هاوئاهەنگیی لەگەڵ شارەوانییەکان و فەرماندەیی هێزەکانی جەندرمە بەپێی پێویست بەهانای خەڵک دەچن لە ئەگەری کۆبوونەوەی ئاو بەهۆی لێزمەباران و ئەگەری روودانی لافاوەکاندا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ