لە هاتای پێنج کەس لەکاتی مەلەکردندا خنکان

ئەو پێنج کەسە کە تاوەکو ئێستا ناوەکانیان دیار نییە، هاوڕێی یەکدی بوون و رۆژی یەکشەممە 22-9-2024 بۆ مەلەکردن چوونەتە نێو بەنداوی شارۆچکەی رەیحانڵی لە پارێزگای هاتای.

 

بە گوێرەی گوتەی شایەتحاڵان، ئەو پێنج کەسە دوای ماوەیەک مەلەکردن، پەلەقاژەیان کردووە و دیارنەماون. خەڵک هەواڵیان بە پۆلیس و تیمی فریاگوزاری داوە.

 

تیمی فریاگوزاریی گەیشتوونەتە شوێنی رووداوەکە و دەستیان بە گەڕان بەدوای ئەو پێنج کەسە کردووە.

 

دوای نزیکەی دوو کاژێر، تەرمی هەر پێنج هاوڕێکە دەرهێندران. لیکۆڵینەوەی سەرەتایی لەلایەن تیمەکان بۆ پێنج تەرمەکە کرا و دەرکەوت کە هەر پێنجیان هاوڵاتیی سووریان.

 

تەرمەکان بۆ لێکۆڵینەوەی زیاتر نێردرانە دادپزیشکیی هاتای.

 

بە گوێرەی ئامارێک کە ئاژانسی دەوڵەتی تورکیا رۆژی 1-9-2024 بڵاویکردووەتەوە، لە مانگەکانی حوزەیران، تەممووز و ئابی ئەم ساڵدا 216 کەس لە ئاودا خنکاون.