داودئۆغڵو: تورکێکی خۆشەویستی کوردم

 

ئەحمەد داودئۆغڵو، سەرۆکی پارتی ئایندەی تورکیا، لەبارەی بایەخی زۆری خۆی و پارتەکەی بۆ کورد و شار و شارۆچکەکانی باکووری کوردستان گوتی، لە سەرەتای دامەزراندنی پارتەکەیاندا زۆر بەخێرا رێکخستنەکانیان لە باکووری کوردستان تەواو کرد و ژمارەیەکی زۆر کورد ئەندامێتییان لە پارتەکەیاندا تۆمار کرد. 

 

داودئۆغڵو لەبارەی دوایین سەردانی بۆ ئامەد و راگەیاندنی نەخشەرێگەی چارەسەرکردنی کێشەی کورد و کورتکردنەوەی لە 10 خاڵدا رایگەیاند، کاردانەوەی زۆر ئەرێنی و بەدەمەوەهاتنی زۆری لێکەوتەوە و دەستخۆشی زۆر کران لە زۆربەی چین و توێژە جیاجیاکانی کۆمەڵگەی کوردی بەگشتیی و ئامەد بەتایبەتی. 

 

سەرۆکی پارتی ئایندە راشیگەیاند، چەقبەستووییەکی زۆر قووڵ لەبارەی چارەسەرکردنی پرسی کورد لە ئارادایە. گرێکوێرەیەکە نە کۆما جڤاکێن کوردستان "کەجەکە" نە دەسەڵات و نە خاوەن هزرە نەتەوەپەرستەکان مەبەستیان نییە بیکەنەوە و لە بەرژەوەندیی ئەواندایە دۆخەکە بەمشێوەیە بمێنێتەوە و گوتی: "نە قەیووم نە کەجەکە، نە تیرۆر نە دەسەڵاتێکی خۆسەپێن ناتوانن پرسی کورد چارەسەر بکەن. تەنیا دیموکراسییەت و سەروەری یاسا توانای چارەسەری هەیە". 

 

داودئۆغڵو هەروەها گوتی: "ئەو هەوڵەی ئێمە رێکخراوی تیرۆریستی و لایەنە پەیوەندیدار و نزیکەکانی نیگەرانکردووە، بەهۆی ئەوەی هەموو کەرەستەکانی ژێر دەستیان مایەپووچ دەکات، هەروەها باخچەلی نیگەران بوو. لە راستیدا رێکخراوی تیرۆریستی و ژینگەکەی لەگەڵ باخچەلی هاوئاوازەکانی لەسەر بنەمای چارەسەرنەکردنی پرسی کورد سیاسەت دەکەن. تەنیا موزایەدە دەکەن و هیچ کاتێک هەنگاوێکیان نەناوە بۆ چارەسەرکردن". 

 

سەرۆکی پارتی ئایندە راشیگەیاند: "ئێمە خاکین، هەموو کات دەتوانین سەردانی برایانی کورد بکەین، بەڵام دەوڵەت باخچەلی ناتوانێت بچێتە ئامەد. ئەردۆغانیش بە سوپایەک پاسەوان قەڵغانێک لەنێوان خۆی و خەڵک دروست دەکات. ئەمەش هۆکاری توڕەبوونی باخچەلی بوو کە بە تووندی رەخنەی لێگرتم و بێڕێزی زۆری کرد. من لە هەفتەیەکدا سەردانی ئامەد و عوسمانییەم کرد، لە ئامەد بە سەرۆک ئەحمەد و لە عوسمانییە بە یۆروک ئەحمەد (ئەحمەدی خاکی) ناویان هێنام". 

 

لە بەردەوامی قسەکانیدا، داودئۆغڵو گوتیشی: "باخچەلی دەیەوێ کوردەکان دەنگ بە کورد بدەن، لە بەرامبەردا تورکەکانیش تەنیا دەنگ بە تورکەکان بدەن. رێکخراوی تیرۆریستی و بەناو نەتەوەپەرست و نیشتمانپەروەرەکان لە دوو شت زۆر نیگەرانن. کوردێکی خۆشەویست لە لایەن تورکەوە، هەروەها تورکێکی خۆشەویست لەلایەن کوردەوە. من تورکێکی خۆشەویستم لەلایەن کوردەوە. شانازیش بەمە دەکەم. رەوانشاد تورگوت ئۆزال [هەشتەم سەرۆککۆماری تورکیا] کوردێکی خۆشەویست بوو لە لایەن تورکەوە. خامەی ئێمە خامەکەی ئامادە کە توانای یەکگرتوویی هەیە". 

 

لەبارەی سیاسەتی دەسەڵات بەرامبەر کورد گوتی: "زمانی کوردی قەدەخە دەکەیت، نکۆڵی لە کورد دەکەیت، کۆنسێرتەکانی قەدەخە دەکەیت و باس لە یەکپارچەیی و نیشتمانپەروەریی دەکەیت و لەگەڵ نزیکبوونەوەی هەڵبژاردنەکان داوای دەنگیان لێدەکەیت. ئەم سیاسەتە هەڵەیە و شکستخواردووە. لای ئێمە هەموو زمانێک پیرۆزە و بایەخ بە هەموو زمانێک دەدەین. بەهۆی ئەم سیاسەتەی ئێمەوە خۆشەویست بووین".