وەزیری ناوخۆ ناسنامەی کۆچبەرەکانی ئاشکرا نەکرد
رووداو دیجیتاڵ
وەزیری ناوخۆی تورکیا رایگەیاند لە رۆژانی پشووی جەژندا تیمە گەڕۆکەکانیان 881 کۆچبەریان دەستگیرکردووە. دەشڵێت "سەرجەمیان دیپۆرت دەکرێنەوە."
عەلی یەرلیکایا، وەزیری ناوخۆی تورکیا، ئەمڕۆ شەممە 22ـی حوزەیرانی 2024 لە هەژماری ئێکس بڵاویکردەوە، لە رۆژانی 15-19ـی مانگ و لە پشووی رۆژانی جەژنی قوربان، تیمە گەڕۆکەکانی هۆبەی کۆچ و کۆچبەران، لە 61 پارێزگای تورکیا و باکووری کوردستاندا پرسیاری ناسنامەیان لە 21 هەزار و 396 کەس کردووە، 881 کۆچبەری نایاساییان دەستگیرکردووە.
وەزیری ناوخۆ ناسنامەی کۆچبەرەکانی ئاشکرا نەکردووە، بەڵام رایگەیاندووە، سەرجەمیان رادەستی ناوەندەکانی دیپۆرتکردنەوە دەکرێن و لە ماوەی کەمتر لە 10 رۆژدا دیپۆرت دەکرێنەوە.
بەگوێرەی ئاماری سه‌رۆكایه‌تى فه‌رمانگه‌ى كۆچ، پار 254 هەزار و هەشت کۆچبەری نایاسایی دەستگیرکراون و 186 هەزار و 19یان دیپۆرتکراونەتەوە. هەروەها 206 هەزار و 421 کۆچبەریش رێگرییان لێکراوە دزە بکەنە نێو سنوورەکانی تورکیا.
بەپێی داتا فەرمییەکان، ساڵی 2022 رێگری لە 280 هەزار و 206 کۆچبەری نایاسایی کراوە دزە بکەنە سنوورەکانی تورکیا. 236 هەزار و 572 کۆچبەری نایاسایی دەستگیرکراون، لەنێویاندا 124 هەزار و 441 کۆچبەر دیپۆرت کراونەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ