سەرۆکی جەهەپە: لەبەر خاتری ئەردۆغان پەیوەندییەکانمان لەگەڵ دەم پارتی ناپچڕێنین

 

رۆژی دووشەممە، 22-1-2024، ئۆزگور ئۆزەل، سەرۆکی جەهەپە و شاندی یاوەری سەردانی پارێزگای دێرسیمیان کرد. ئۆزەل سەبارەت بەو گوشارانەی لەلایەن دەسەڵاتەوە دەکرێتە سەریان بەهۆی بوونی دیدار و کۆبوونەوەیان لەگەڵ پارتی یەکسانی و دیموکراسیی گەلان (دەم پارتی) رایگەیاند: "ئێمە تەنیا لەبەر ئەوەی کاک تەیب نایەوێت، پەیوەندی لەگەڵ دەم پارتی ناپچڕێنین و بێڕێزی بە دەنگدەرانیان ناکەین".

 

سەرۆکی جەهەپە هەروەها جەختیکردەوە، دەم پارتی فراکسیۆنی لە پەرلەمان هەیە و جەهەپە هاوشێوەی پارتەکانی دیکە، پەیوەندیی لەگەڵیدا هەیە. هاوکات وەڵامی رەخنەکانی ئاکپارتی، مەهەپە و ئیی پارتی سەبارەت بە بوونی پەیوەندیی جەهەپە لەگەڵ دەم پارتی دایەوە و گوتی: "هیچ پارتێکی سیاسی کە لە پەرلەمان فراکسیۆنی هەیە و دەنگی خەڵکی بەدەستهێناوە، لە دیدی ئێمەدا شەیتان نییە. داوای کۆبوونەوەیان کرد؛ پێماندان و هاتن کۆبووینەوە. هەڵبژاردنیان کرد، بۆ پیرۆزبایی سەردانمان کردن".

 

هەموو ئەمانە لەکاتێکدان باکووری کوردستان و تورکیا لە هەڵبژاردنی شارەوانییەکان نزیکدەبێتەوە و دیداری پارتەکان بۆ رێککەوتن و هاوپەیمانی دریژەی هەیە. لە هەڵبژاردنەکانی پێشوودا ئیی پارتی لەگەڵ جەهەپە لە هاوپەیمانیی میللەت بوون و رکابەریی هاوپەیمانیی جمهووریان دەکرد کە ئاکپارتی و مەهەپە پێکیانهێناوە. بەڵام لەم هەڵبژاردنەدا ئیی پارتی لە هاوپەیمانییەکە دەرچووە و بە تەنیا بەشداری لە هەڵبژاردندا دەکات. هاوکات ئیی پارتی زۆرترین رەخنەی ئاراستەی جەهەپە و دەم پارتییە و کەمتر رەخنە لە دەسەڵات دەگرێت. 

 

لە تورکیا و باکووری کوردستاندا 30 گەورە شارەوانی، 51 شارەوانیی شارەکان و زیاتر لە 1000 شارەوانی شارۆچکەکان هەن؛ 20 هەزار و 745 ئەندامی ئەنجوومەنی شارەوانییەکان و هەزار و 272 ئەنجوومەنی گشتیی شارەکان هەن؛ هەروەها 50 هەزار و 229 موختار هەڵدەبژێردرێن.

 

لە هەڵبژاردنی شارەوانییەکانی ساڵی 2019دا ئاکپارتی 15 گەورەشارەوانی، جەهەپە 11 گەورەشارەوانی، هەدەپە 3 گەورەشارەوانی و مەهەپە 1 گەورەشارەوانییان بەدەستهێنا.

 

هەدەپە (دەم پارتی) لە باکووری کوردستاندا 3 گەورەشارەوانی، 5 شارەوانی شار، 40 شارەوانیی شارۆچکەی بەدەستهێنا، بەڵام ئێستا تەنیا پێنج شارەوانی لەدەستدا ماوەتەوە و ئەوانی دیکە قەییومیان بۆ دانرا.