قەدەخەکانی رۆژی هەڵبژاردنی شارەوانیی تورکیا بڵاوکرانەوە: فرۆشتنی خواردنەوەی کحولی قەدەخەیە

 

 

بەگوێرەی ئەو بڕیارانەی دامەزراوەی فەرمیی هەڵبژاردنی تورکیا بڵاویکردووەتەوە، رۆژی 31-03-2024 لە کاژێر 06:00ی بەیانییەوە تاوەکو 11:59ی شەو فرۆشتنی خواردنەوە کحولییەکان و خواردنەوەیان لە شوێنە گشتییەکاندا بە هەموو شێوەیەک قەدەخەیە. هەروەها جگە لە هێزە ئەمنییەکان، هەڵگرتنی چەک و چەقۆ و کەرەستەیەک کە زیان بگەیێنێت، قەدەخەیە.

 

لە رۆژی هەڵبژاردندا قاوەخانەکان، کافێی خوێندنەوە، کافێی ئینتەرنێت و ناوەندەکانی یاریکردن و کات بەسەربردن دادەخرێن. ئەو شوێنانە ئەگەر خواردنیان هەبێت، تەنیا لەکاتی ژەمەکانی نانخواردندا بۆیان هەیە بیکەنەوە. هەروەها ئاهەنگی بوکگواستنەوە تەنیا لەدوای کاژێر 06:00ی ئێوارەی ئەو رۆژە دەکرێت.

 

لە رۆژی هەڵبژاردندا دەزگا میدیاییەکان بۆیان نییە بەر لە کاتی راگەیاندنی ئەنجامەکان، ژمارە و بۆچوونی خۆیان سەبارەت بە ئەنجامەکان بڵاوبکەنەوە. ئەمەش لەکاتێکدایە، قەدەخەی راگەیاندن کاژێر 09:00ی شەو هەڵدەگیرێت و ئەوکات راگەیاندنەکان بۆیان هەیە ئەنجامەکان بڵاوبکەنەوە.

 

هەر بەگوێرەی بڕیارێکی دیکەی دامەزراوەی باڵای هەڵبژاردنەکانی تورکیا، 10 رۆژ بەر لە هەڵبژاردنەکان نابێت هیچ راپرسی و پرۆگرامێکی دیکەی دەنگدان بکرێت و بڵاوبکرێتەوە.

 

هەڵبژاردنی شارەوانییەکانی باکووری کوردستان و تورکیا رۆژی 31-03-2024 بەڕێوەدەچێت. لە هەڵبژاردنی رابردووی شارەوانییەکانی تورکیا کە ساڵی 2019 بەڕێوەچوو، ئاکپارتی 44.33% و جەهەپە 30.12%ی دەنگەکانیان بەدەستهێنا. لەو هەڵبژاردنەدا هەدەپە بە ناڕاستەوخۆ پشتیوانی لە هاوپەیمانیی میللەت (جەهەپە و ئیی پارتی) کرد کە بەو پشتیوانییە هاوپەیمانیی جمهوور (ئاکپارتی و مەهەپە) شارەوانییەکانی ئیستەنبووڵ، ئەنقەرە، ئەدەنە، مێرسین، ئەنتاڵیا، کڕشەهیر، ئارتڤین، ئەردەخان، بۆڵو و چەند شوێنێکی دیکەی گرنگی لەدەستدا؛ بەڵام بۆ ئەم هەڵبژاردنە دەم پارتی، کە بە جێگرەوەی هەدەپە دادەنرێت، بڕیاریداوە هیچ رێککەوتنێکی شاراوە و ناشەفاف نەکات. ئەگەر هاوپەیمانی بکرێت، دەبێت لەسەر کاخەز بێت.