رووداو دیجیتاڵ
سەرۆککۆماری تورکیا پیرۆزبایی جەژنی نەورۆز دەکات و دەشڵێت، لە 21 ساڵدا تورکیایان سێ هێندە گەشە پێداوە و "ئامانجمانە لە قۆناخی داهاتوودا دوو هێندەی دیکە گەورەی بکەین و بیگەیێنینە شوێنی شیاوی خۆی لە نێو وڵاتانی خاوەن بەهێزترین ئابووریی جیهان".
ئێوارەی رۆژی پێنجشەممە، 21ـی ئاداری 2024، رەجەب تەیب ئەردۆغان، سەرۆککۆماری تورکیا و سەرۆکی ئاکپارتی، بەشداریکرد لە کۆبوونەوەیەکی جەماوەری ئەندامان و لایەنگرانی پارتەکەی لە پارێزگای قەیسەری و بەر لە ناساندنی بەربژێرانی شارەوانییەکانی، گوتارێکی پێشکێش کرد.
لە دەسپێکی گوتارەکەیدا، رەجەب تەیب ئەردۆغان پیرۆزبایی جەژنی نەورۆزی کرد و رایگەیاند: "پیرۆزبایی جەژنی نەورۆز لەو خوشک و برایانەی ئەو جوگرافیایەمان دەکەم کە لە جۆشوخرۆشی نەورۆزدا دەژین. هیوادارم نەورۆز ببێتە مایەی خێر بۆیان هەر لە رۆژهەڵاتی نێوەڕاستەوە تا دەگاتە ناوچەکانی بەلقان و ئەو جوگرافیا زۆر فراوانەی کە بە ئومێدی نوێوە جەژنەکە بەرز رادەگرن".
ئەردۆغان باسی لەوە کرد کە لە 21 ساڵدا تورکیایان سێ هێندە گەشە پێداوە و رایگەیاند: "ئامانجمانە لە قۆناخی داهاتوودا دوو هێندەی دیکە گەورەی بکەین و بیگەیێنینە شوێنی شیاوی خۆی لە نێو وڵاتانی خاوەن بەهێزترین ئابووریی جیهان".
گوتیشی: "تورکیامان لە مێژووی کۆماردا گەیاندە بەهێزترین ئاستی سیاسیی، ئابووریی، سەربازیی و کۆمەڵایەتی. لەلایەک کەموکوڕییەکانی ژێرخانمان تەواو کرد کە بەهۆی پشتگوێخستنی چەندین سەدەوە کەڵەکە ببوو، لەلایەکی دیکەوە گەلەکەمان بە حەسرەتی ماف و ئازادی شادکرد. پشتیوان بە خودا لە 31ی ئاداردا ئەم داستانی ئیرادەی نیشتمانییە بەرەوپێش دەبەین و کەمێکی دیکە ریزی دیموکراسیمان پتەو دەکەین".
تەنیا 10 رۆژ ماوە بۆ بەڕێوەچوونی هەڵبژاردنی شارەوانییەکانی باکووری کوردستان و تورکیا کە بڕیارە لە 31ـی ئاداری ئەم ساڵ بەڕێوەبچێت و سەرجەم لایەنە بەشداربووەکانی هەڵبژاردن، بانگەشەکانیان چڕتر دەکەنەوە و هەوڵی کۆکردنەوەی زۆرترین دەنگ دەدەن.
لە تورکیا و باکووری کوردستاندا 30 گەورە شارەوانی، 51 شارەوانیی شارەکان، 973 شارەوانیی قەزاکان و 390 شارەوانیی ناحیەکان هەن؛ 20 هەزار و 745 ئەندامی ئەنجوومەنی شارەوانییەکان و هەزار و 272 ئەنجوومەنی گشتیی شارەکان هەن؛ هەروەها 50 هەزار و 336 موختار هەڵدەبژێردرێن.
لە هەڵبژاردنی شارەوانییەکانی 31ـی ئاداری 2024دا لە سەرانسەری تورکیا و باکووری کوردستاندا 61 ملیۆن و 441 هەزار و 882 کەس مافی دەنگدانیان هەیە کە 50.59٪ی دەنگدەران مێینەن و 49.41٪یشیان پیاون. هەروەها 1 ملیۆن و 32 هەزار و 610 کەس بۆ یەکەمجار دەنگ دەدەن.
لە هەڵبژاردنی شارەوانییەکانی ساڵی 2019دا ئاکپارتی 15 گەورەشارەوانی، جەهەپە 11 گەورەشارەوانی، هەدەپە سێ گەورەشارەوانی و مەهەپە یەک گەورەشارەوانییان بەدەستهێنا.
هەدەپە لە باکووری کوردستاندا 3 گەورەشارەوانی، 5 شارەوانی شار، 40 شارەوانیی شارۆچکەی بەدەستهێنا، بەڵام ئێستا تەنیا پێنج شارەوانی لەدەستدا ماوەتەوە و ئەوانی دیکە قەییومیان بۆ دانرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ