رووداو دیجیتاڵ
سەرۆکی پارتی بزووتنەوەی نەتەوەیی - مەهەپە دەڵێت، تورکیا بە کردار چووەتە کەشی هەڵبژاردن و تەنیا 114 رۆژ ماوە بۆ چوونە سەر سندووقەکانی دەنگدان.
دەوڵەت باخچەلی لە هەژماری تایبەتی خۆی لە تۆڕی کۆمەڵایەتیی تویتەر لەبارەی هەڵبژاردن لە تورکیا چەند تویتێکی بڵاوکردەوە و رایگەیاند: "ئەگەر لە رووی یاساییەوەش نەبێت، بە کردار تورکیامان چووەتە نێو کەشی هەڵبژاردنەوە. ئەنجامدانی هەڵبژاردنی گشتیی سەرۆکایەتی و پەرلەمان لە رۆژی یەکشەممە 14ی ئایاری 2023 بووەتە رۆژەڤ. 114 رۆژ ماوە بۆ هەڵبژاردن".
باخچەلی لە تویتەکەیدا نوسیوویەتی: "تورکیامان لە گرنگترین هەڵبژاردن نزیک دەبێتەوە کە کاریگەری لەسەر چارەنووسی مێژووی دیموکراسیمان دەبێت. نەتەوەی گەورەی تورک ویستی خۆی پیشان دەدات و نەخشەڕێگەی وڵاتەکەمان بۆ ساڵانی داهاتوو دەکێشێت و سەدەی نوێی کۆمار بەهێزتر دەکات".
باخچەلی ئاماژەی بە لێدوانەکانی سەرۆککۆماری تورکیا داوە و زیاتر نوسیوویەتی: "14ی ئایار رۆژی پارێزگاریکردن لە بوونی 85 ملیۆن هاووڵاتیی تورکیایە".
لە بەشێکی دیکەی تویتەکانیدا نووسیویەتی: "مەهەپە و هاوپەیمانیی جمهوور ئامادەن بۆ هەڵبژاردنەکانی 2023. پێمان وایە سەرکەوتنێکی نوێی دیموکراسی بە هەڵوێستی نیشتمانپەروەرانە تۆمار دەکرێت. یادی 100 ساڵەی کۆمار مژدەی تورکیای بەهێز و پێشکەوتووی داهاتوو دەبێت".
رۆژی 17ـی کانوونی دووەمی 2023، رەجەب تەیب ئەردۆغان، سەرۆککۆماری تورکیا لە کۆبوونەوەی هەفتانەی فراکسیۆنی ئاکپارتی لە پەرلەمانی تورکیا لەبارەی ئەنجامدانی هەڵبژاردن ئاماژەی بۆ وادەی هەڵبژاردن کرد و رایگەیاند، دەکرێ هەڵبژاردنەکان پێش بخرێن و لە 14ـی ئایاری ئەمساڵ هەڵبژاردن بکرێت.
هەرچەندە وادەکە فەرمی نییە، بەڵام لە ئەگەری دیاریکردنی رۆژی هەڵبژاردن لەلایەن سەرۆککۆماری تورکیاوە، بەپێی یاسای هەڵبژاردن، 60 رۆژ دوای راگەیاندنی وادەکە هەڵبژاردن دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ