459 کەس لە تورکیا بە تۆمەتی ئەندامبوون لە بزووتنەوەی خزمەت دەستگیرکران

 

بە گوێرەی راگەیێندراوی عەلی یەرلیکایا، وەزیری ناوخۆی تورکیا لە تۆڕی کۆمەڵایەتیی ئێکس، ئۆپەراسیۆنەکە رۆژی سێشەممە 19-11-2024 لە 66 پارێزگا بەڕێوەچووە و هێزەکانی ئاسایش هەڵیانکوتاوەتە سەر چەندین شوێن کە گومان دەکرا ئەندامی ئەو بزووتنەوەیەی تێدا بێت.

 

ئۆپەراسیۆنەکە لە 44 پارێزگای تورکیا و 22 پارێزگای باکووری کوردستان بەرێوەچوو.

 

بەپێی ئەو زانیارییانەی وەزیری ناوخۆی تورکیا بڵاویکردوونەتەوە، ئەو 459 کەسە تۆمەتبارن بە ئەندامبوون لە بزووتنەوەی خزمەت، داڵدەدانی ئەندامانی، دەستخستنی سەرچاوەی دارایی بۆیان، بانگەشەکردن و کۆبوونەوەی نهێنی.

 

شەوی 15ی تەمموزی 2016، بەشێک لە سەربازانی سوپای تورکیا جووڵەیان پێکرا و دەستیان بەسەر چەند دامودەزگایەکی حکومەتدا گرت، بەڵام ئەو هەوڵە هەرەسی هێنا و وەک کودەتا شکستخواردووەکەی 15ـی تەمموز چووە نێو مێژووی تورکیاوە.

 

حکومەتی تورکیا گولەنییەکانی خستووەتە لیستی تیرۆر و بە ئەنجامدانی هەوڵی کودەتاکە تۆمەتباریان دەکات، ئەوە لەکاتێکدایە گولەنییەکان رەتیدەکەنەوە دەستیان لە هەوڵێکی وەهادا هەبووبێت.

 

دوای هەوڵی کودەتاکە باری نائاسایی راگەیێندرا و حکومەتی تورکیا ئۆپەراسیۆنی دژی گولەنییەکان دەستپێکرد. 

 

بەهۆی ئەوەی فەتحوڵڵا گولەن، رابەری ئەو کاتی گولەنییەکان لە ویلایەتی پێنسیلڤانیای ئەمریکا بوو، ئەم بابەتە کاریگەری خستەسەر پەیوەندییەکانی ئەنقەرە - واشنتنیش. 

 

تورکیا چەندین جار داوای لە ئەمریکا کرد گولەن و بەشێک لە هاوڕێکانی رادەست بکات، بەڵام ئەو هەوڵە هیچ ئەنجامێکی بۆ ئەنقەرە نەبوو.

 

رۆژی 21-10-2024 فەتحوڵڵا گولەن باری تەندروستیی تێکچوو و گوێزرایەوە بۆ نەخۆشخانەیەکی پێنسیلڤانیا و دواتر کۆچی دوایی کرد.