رووداو دیجیتاڵ
وەزیری ناوخۆی تورکیا دەستگیرکردنی 222 کەسی بە تۆمەتی ئەندامبوونیان لە پارتی کرێکارانی کوردستان (پەکەکە) لە 36 پارێزگای باکووری کوردستان و تورکیا راگەیاند.
ئەمڕۆ 17ی ئابی 2024 عەلی یەرلیکایا، وەزیری ناوخۆی تورکیا لە هەژماری خۆی لە تۆڕی کۆمەڵایەتیی ئێکس، ئەنجامدانی ئۆپەراسیۆنێکی بەناوی گورز لە 36 پارێزگای باکووری کوردستان و تورکیا راگەیاند و ئاماژەی بەوەشکرد، 222 گومانلێکراو لە ئۆپەراسیۆنەکەدا دەستگیرکراون.
وەکو لە راگەیێندراوەکەی وەزیری ناوخۆی تورکیادا هاتووە، بە هاوئاهەنگی میت و هەواڵگریی ئاسایش، زانیاری لەبارەی شانە نهێنییەکانی پەکەکە کۆکرایەوە و دوای وەرگرتنی رەزامەندیی دادوەر، ئۆپەراسیۆنێکی هاوکات ئەنجامدرا.
عەلی یەرلیکایا دەڵێت، ئۆپەراسیۆنەکان لە پارێزگاکانی سەمسوور، ئاگری، ئەردەخان، ئێلیهـ، چەولیگ، ئامەد، خارپێت، ئەرزەڕۆم، دیلۆک، مەڵەتێ، مێردین، مووش، سێرت، رووها، شرنەخ و وان لە باکووری کوردستان و پارێزگاکانی ئەنقەرە، ئادانا، ئەنتالیا، بالکئەسیر، بورسا، چاناکالە، دەنیزلی، ئەسکیشەهیر، هاتای، ئیستەنبووڵ، ئیزمیر، قەیسەری، کۆجائێلی، کۆنیا، مانیسا، مەرسین، نیدە، ساکاریا، تەکیرداغ و یاڵۆڤای تورکیا ئەنجامدراوە.
وەزیری ناوخۆی تورکیا دەڵێت، لە کاتی پشکنینی ئەو شوێنانەی گومانلێکراوەکان تێیاندا دەستگیرکراون، دەستبەسەر ژمارەیەکی زۆر بەڵگەنامەی دیجیتاڵی و چەکی بێ مۆڵەت و چەندین بڵاوکراوەی پەکەکەدا گیراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ