کاتی دەستگیرکردنی بەشێک لە تۆمەتبارەکان. وێنە: AA
رووداو دیجیتاڵ
دوای ئۆپەراسیۆنێکی دژی رێکخراوی پارتی ئازادیی گەلی شۆڕشگێڕ (DHKP/C) لە ئیستەنبووڵ و پێنج پارێزگای دیکە، 13 کەس خرانە گرتووخانە.
لە کۆی 27 کەس کە لە ئۆپەراسیۆنێکی بەرەنگاربوونەوەی رێکخراوی DHKP-C لە ئیستەنبووڵ و پێنج پارێزگای دیکەدا دەستبەسەر کرابوون، 13یان بڕیاری بەندکردنیان بۆ دەرکرا.
تیمەکانی هۆبەی بەرەنگاربوونەوەی تیرۆر لە بەڕێوەبەرایەتی ئاسایشی ئیستەنبووڵ، لە چوارچێوەی یاسای پەیوەندیدار بە رێگەگرتن لە دابینکردنی داهات بۆ تیرۆر، دەستیان بە دواداچوون کرد. تیمەکان، ناونیشانی 28 گومانلێکراویان دیاریکرد کە تۆمەتی ناردنی پارەیان بۆ رێکخراوەکە درابووە پاڵ.
لە ئۆپەراسیۆنێکی هاوکاتدا لە ئیستەنبووڵ، ئەنقەرە، بورسا، هاتای، کۆجائەلی و مێرسین 27 کەس دەستگیرکران. بەپێی گوتەی تیمەکانی پۆلیس، لە کاتی گەڕان و پشکنینەکاندا دەست بەسەر ژمارەیەکی زۆر بەڵگەنامەی رێکخراوەیی و ئامێری دیجیتاڵیدا گیراوە.
13 لەو تۆمەتبارانە دوای رێکارە یاساییەکانیان لە ئاسایش رەوانەی دادگە کران و بڕیاری بەندکردیان بۆ دەرکرا. هەروەها بڕیاری زیندانیکردن لە ماڵەوە بۆ سێ تۆمەتبار دەرکرا و نۆ تۆمەتباریش بە مەرجی چاودێری کردنیان لەلایەن دادگەوە، ئازاد کران. رێکاری یەکێکیشیان درێژەی هەیە.
ئۆپەراسیۆن بۆ دەستگیرکردنی گومانلیکراوێکی دیکە کە لەمیانی ئۆپەراسیۆنەکاندا نەتوانرا ناونیشانەکەیدا بدۆزرێتەوە، بەردەوامە.
رێکخراوی پارتی ئازادیی گەلی شۆڕشگێڕ کە (DHKP/C) کورتکراوەکەیەتی، رۆژی 30-3-1994 بە سەرۆکایەتیی گورسەن کاراتاش دامەزرێنرا. هەرچەندە ئەو رێکخراوە بە بڕیارێک فۆرمی پارتی سیاسیی وەرگرت، بەڵام لەلایەن حکومەتی تورکیاوە بە رێکخراوی تیرۆریستی دەبینرێت. DHKP/C پارتێکی مارکسیست-لینینیستە. (DHKP) باڵە چەکدارییەکەتی و بەرپرسە لە چالاکییە چەکدارییەکان. هەروەها دها کەپەجە (DHKC) بەرپرسە لە چالاکییە سیاسییەکانی ئەو پارتە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ