لە شارێکی تورکیا دوو کەس هێرشیان کردە سەر پەیکەری ئەتاتورک

 

 

رووداوەکە کاژێر 11:30ی ئەمڕۆ یەکشەممە لە گۆڕەپانی (جمهووری) لە شاری کایسەری روویدا. پیاوێک و ژنێک بە تەور پەلاماری پەیکەری ئەتاتورکیان دا و بەو هۆیەوە زیان بە پەیکەرەکە کەوت.

 

هێزی چاودێریی بازاڕ رووداوەکەیان بینی و تیمێک نێردرا و دوو کەسەکەیان بەناوی یاشار و زەینەب کە خاڵ و خوشکەزان دەستگیریان کردن.

 

لەکاتی دەستگیرکرانیاندا رۆژنامەڤانان پرسیاری ئەوەیان کرد کە بۆچی ئەو کارەیان کردووە؟ لە وەڵامدا زەینەب گوتی: "لەبەر خودا کردوومانە" و یاشاریش رەتیکردەوە، پەشیمان بن لەوەی کردوویانە. 

 

پارێزگای کایسەری لە راگەیێندراوێکدا دەڵێت: "هەواڵمان لەبارەی دوو کەس پێدرا کە خاڵ و خوشکەزان و هەوڵیاندابوو زیان بە پەیکەری ئەتاتورک بگەیەنن".

 

پارێزگا هەروەها رایگەیاندووە، لێکۆڵینەوە دەکەن. 

 

مستەفا کەمال ئەتاتورک کە لە تورکیا بە رزگارکەری تورکیا لە دەستی هێزە رۆژئاواییەکان دەناسرێت، رۆژی 9ـی ئەیلوولی 1923 پارتی گەلی کۆماری - جەهەپەی دامەزراند؛ رۆژی 29-10-1923 کۆماری تورکیای راگەیاند. ئەتاتورک ساڵی 1923 تاوەکو 1950، 17 جار حکومەتی پێکهێنا.