رووداو دیجیتاڵ
وەزیری ناوخۆی تورکیا رایگەیاند، لە یەکەم رۆژی پشووەکانی جەژنی قورباندا 852 رووداوی هاتووچۆ روویانداوە و بەهۆیانەوە پێنج کەس گیانیان لەدەستداوە.
ئەمڕۆ یەکشەممە 16ی حوزەیرانی 2024 عەلی یەرلیکایا، وەزیری ناوخۆی تورکیا لە هەژماری تایبەتی خۆی لە تۆڕی ئێکس بڵاویکردەوە، لە 24 کاژێری رابردووی پشووەکانی جەژنی قورباندا، لە رێگە سەرەکییەکاندا 852 رووداوی هاتووچۆ روویانداوە و بەهۆیانەوە پێنج کەس گیانیان لەدەستدا و 1421 کەس بریندار بوون.
وەزیری ناوخۆی تورکیا راشیگەیاند، شۆفێری 24357 ئۆتۆمبێل لە رێگەی کامێراکانی تۆمارکردنی تیژڕۆییەوە سزادراون و سزای پێبژاردنیش بۆ 42720 شۆفێر نووسراوە. هەروەها پشکنین بۆ 407731 ئۆتۆمبێل کراوە.
یەرلیکایا ئەوەشی خستەڕوو، بۆ کەمکردنەوەی ژمارەی رووداوەکانی هاتووچۆ، بڕیاریان داوە تاوەکو کۆتایی پشووی جەژنی قوربان، هاتووچۆی سەرجەم بارهەڵگرەکان، ئامێرەکانی کارکردنی بیناسازی و کشتوکاڵی لەسەر رێگە سەرەکییەکانی نێوان شارەکان قەدەخە بکرێت.
لە سەرانسەری تورکیا و باکووری کوردستاندا، پشووی جەژنی قوربان نۆ رۆژە و لە 14ی حوزەیرانەوە دەستیپێکردووە و تاوەکو 23ـی مانگ دەخایێنێت. ژمارەیەکی زۆر لە هاووڵاتییان لە تورکیا و هاونیشتمانیان لە باکووری کوردستان بۆ بەسەربردنی پشووی جەژنی رەمەزان گەشت دەکەن. بەو هۆیەوە قەرەباڵخییەکی زۆر لە رێگە سەرەکییەکانی نێوان شارەکان و فڕۆکەخانەکاندا دروستبووە.
وەزارەتی ناوخۆی تورکیا پێشبینی دەکات، نزیکەی شەش ملیۆن کەس بۆ بەسەربردنی پشووی جەژن بە رێگەی وشکانی و بە سوودوەرگرتن لە ئۆتۆمبێلی کەسی خۆیان و پاسە گەشتیارییەکانی نێوان شارەکان و لە رێگەی فڕۆکەخانەکانەوە گەشت بکەن.
بەڕێوەبەرایەتیی گشتیی رێگاوبانەکانی تورکیا بڕیاریداوە، لە رۆژانی 15-24ـی حوزەیران کرێی هاتووچۆی هاووڵاتییان بەسەر تەواوی پرد و تونێلە سەرەکییەکانی سەر رێگە خێرا و ئۆتۆبانەکان بێبەرامبەر بکات. ئامانج لەم بڕیارە، کەمکردنەوەی قەرەباڵخییەکان و بەرگرتنە لە رووداوەکانی هاتووچۆ.
وەزارەتی ناوخۆی تورکیا ئاماری رووداوەکانی هاتووچۆی نۆ رۆژ پشووەکانی جەژنی رەمەزانی بڵاوکردەوە و رایگەیاند، لە رێگە سەرەکییەکاندا چوار هەزار و 998 رووداوی هاتوچۆ روویانداوە و بەهۆیەوە 66 کەس گیانیان لەدەستدا و هەشت هەزار و 352 کەس بریندار بوون.
وەزارەتەکە لە چوارچێوەی پلانی ئەمنی و سەلامەتی هاووڵاتییان بۆ پشووی جەژنی رەمەزان، 210 هەزار و 440 کارمەندی هێزە ئەمنییەکانی لەسەرانسەری تورکیا و باکووری کوردستاندا ئەرکدار کردبوو. بەسەر 22 هەزار و 800 تیم دابەشی کردبوون و رۆژانە هەشت هەزار و 612 تیم بە 65 هەزار کارمەندەوە لە ئەرکدا بوون. 30 هێلیکۆپتەر، 417 درۆن و 300 سەگی مەشقپێکراو بۆ ماوەی 24 کاژێر لە ئەرکدا بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ