گوتەبێژی ئاکپارتی: راگەیاندنی سەرکەوتنی کڵچدارئۆغڵو بێڕێزییە بە هەڵبژاردن

 

عومەر چەلیک، گوتەبێژی ئاکپارتی لە دوایین کۆنگرەی رۆژنامەڤانیدا کە لە بارەگای سەرەکیی ئاکپارتی لە ئەنقەرە کردی، باسی بەڕێوەچوونی پرۆسەی هەڵبژاردنەکانی کرد و رایگەیاند، کێشەی لاوەکی روویانداوە، بەڵام کێشەی گەورە نەبووە و کاریگەریی نەرێنی نەخستووەتە سەر دەنگدان. 

 

راشیگەیاند، هەریەک لە ئەکرەم ئیمامئۆغڵو، سەرۆکی شارەوانیی ئیستەنبووڵ و مەنسوور یاڤاش، سەرۆکی شارەوانیی ئەنقەرە کە بە ناوی کڵچدارئۆغڵو قسە دەکەن، چەندجارێک پێداگرییان لە بردنەوەی بەربژێرەکەیان کرد. ئەمە رێکەوت نەبووە؛ بە ئەنقەست کردوویانە و دەیانەوێت رەوشەکە تێکبدەن.  

 

عومەر چەلیک پرسی "چۆن دەکرێ هێشتا ژماردن و جیاکردنەوەی دەنگەکان کۆتاییان نەهاتووە، ئەوان ئەنجامەکە رابگەیێنن؟ بەبێ ئەوەی رێز لە ئیرادەی گەل بگرن، دەست بە بڵاوکردنەوەی ئەنجامەکە بکەن. ئەمە لە کاتێکدایە رەجەب تەیب ئەردۆغان، بەربژێری هاوپەیمانی جمهوور بە جیاوازییەکی زۆر لە پێشەوەیە، بەڵام سەرباری ئەمەش ناڵێین بەربژێرەکەمان سەرکەوت و بردییەوە و کۆتایی بە هەڵبژاردن هات". 

 

چەلیک راشیگەیاند، "ئێمە، رێز لە بنەمای دیموکراسییەت دەگرین و رێز لە ئەنجامەکەی دەگرین. هۆشداریمان پێدان بەوەی دەستبەرداری ئەم جۆرە لێدوانانە بن، بەڵام ئەوان هەر سوورن لەسەر ئەو بابەتە و دەڵێن ئێمە نوێنەرانی سەرۆککۆمارین. ئەوەی ئەمانە کردوویانە بێ رێزییە". 

 

دوێنێ لە سەرانسەری تورکیا و باکووری کوردستان هەڵبژاردنی 28ـەمین خولی پەرلەمانی تورکیا و حەوتەمین سەرۆککۆمار بەڕێوەچوو و بەپێی ئاژانسی ئەنادۆڵوو کە ئاژانسی فەرمیی حکومەتی تورکیایە رێژەی سندووقە کراوەکان کە دەنگەکانیان جیاکراوەتەوە 98.89٪ـیە و ئەنجامەکانیش بەمشێوەیەن:

 

رەجەب تەییب ئەردۆغان: %49.3

کەمال کڵچدارئۆغڵو: %44.9

سینان ئۆغان: %5.21

 

هاوپەیمانیی جهموور: 49.31٪

هاوپەیمانیی میللـەت: 35.21٪ 

هاوپەیمانیی رەنج و ئازادی: 10.49٪  

هاوپەیمانیی ئاتا: 2.45٪