رووداو دیجیتاڵ
یاریزانێکی یانەی ئەنتاڵیای تورکی بە ناوی (ساگیڤ یەهزکەل) کە هاووڵاتیی ئیسرائیلە، دوای تۆمارکردنی گۆڵ لە دژی یانەی ترابزۆن ئاهەنگی گێڕا و شانازیی بە هێرشەکانی ئیسرائیل بۆ سەر غەززە کرد و بەوهۆیەوە دەستگیرکرا.
یاریی نێوان ئەنتاڵیا و ترابزۆن رۆژی یەکشەممە، 14-1-2024 لە چوارچێوەی خولی سوپەرلیگی تورکی بەڕێوەچوو. یانەی ئەنتاڵیاسپۆر لە خولەکی 2ـی یارییەکەدا گۆڵێکی تۆمارکرد و گێمی یەکەم بەو ئەنجامە کۆتاییهات. لە خولەکی 68ـی یارییەکەدا یاریزان ساگیڤ یەهزکەل کە جووە و هاووڵاتیی ئیسرائیلە، گۆڵی یەکسانبوونی بۆ ئەنتاڵیاسپۆر تۆمارکرد و ئاهەنگی گێڕا.
ئاهەنگگێڕانەکەی ساگیڤ یەهزکەل پێشاندانی مەچەکی چەپی بوو کە لەسەری نووسرابوو "100 رۆژ 07.10" ئەمەش وەکو ئاماژەیەک بە دەستپێکردنی هێرشەکانی ئیسرائیل بۆ سەر غەززە لە 07-10-2023 کە نزیکەی 100 رۆژە. دوای ئەوەی یانەکەی سزای دا و لە پێکهاتەی سەرەکی دووری خستنەوە، دەستگیریش کرا. درەنگی شەوی رابردوو 14-1-2024 یڵماز تونچ، وەزیری دادی تورکیا رایگەیاند " ئەو یاریزانە دەستگیرکراوە و لێکۆڵینەوە لە بابەتەکە لە دادگە، دەستیپێکردووە."
دوای ئەو هەڵسوکەوتەی، کارگێڕیی یانەی ئەنتاڵیا بڕیاریدا یاریزانە جووەکە لە پێکهاتەی سەرەکیی تیپەکەیدا بسڕێتەوە. یانەی ئەنتاڵیا ئێوارەی یەکشەممە، 14-1-2024 راگەیێندراوێکی سینان بۆزتەپە، سەرۆکی یانەکەی لە هەژماری فەرمیی خۆی لە تۆڕی کۆمەڵایەتیی ئێکس بڵاوکردەوە و ئاماژەی بەوەکرد "نیگەرانن بەرامبەر ئەو هەڵسوکەوتەی یاریزان ساگیڤ یەهزکەل کە پێشێلی هەستیارییەکانی یانەی ئەنتاڵیا و تورکیاشی کردووە."
لە بەشێکی دیکەی راگەیێندراوەکە سەرۆکی یانەی ئەنتاڵیاسپۆر باس لەوە دەکات کە یانەکەیان درەنگ هەستیان بەو هەڵسوکەوتە کردووە و هەر کە پێیانزانیوە راستەوخۆ گۆڵەکەیان لە تۆڕە کۆمەڵایەتییەکانی یانەکەیان سڕیوەتەوە، سینان بۆزتەپە دەشڵێت، "ئێمە کە دەمانەوێت یاریزانانمان تەنیا وەکو یاریزان ببینرێن و هیچ جیاکاریی ئایین، زمان و نەژاد نەکەن، چاوپۆشی لە هەڵسوکەوتێکی لەوجۆرە ناکەین."
کارگێڕیی یانەی ئەنتاڵیاسپۆر بڕیاری دوورخستنەوەی یاریزان ساگیڤ یەهزکەل لە پێکهاتەی سەرەکیی یانەکەی دا، بەڵام گوشارەکانی تۆڕی کۆمەڵایەتی تاوەکو دێت زیاتر دەبن و داوا دەکرێت ئەو یاریزانە لە یانەکە دەربکرێت و دیپۆرت بکرێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ