سەرۆکی پەرلەمان: تورکیا لە دەستووری کودەتای سەربازی رزگاری دەبێت
رووداو دیجیتاڵ
سەرۆکی پەرلەمانی تورکیا لە چوارچێوەی دیدارەکانی بۆ دەستوورێکی نوێ لە تورکیا، لەگەڵ دەوڵەت باخچەلی، سەرۆکی پارتی نەژاد پەرستی تورکیا - مەهەپە، لە پەرلەمانی تورکیا کۆبووەوە و گوتی، "تورکیا لەو دەستوورە رزگاری دەبێت کە بەرهەمی کودەتایەکی سەربازییە."
نوعمان کورتولموش، سەرۆکی پەرلەمانی تورکیا دوای کۆبوونەوەی لەگەڵ سەرۆکی مەهەپە، سەبارەت بە هەوڵەکانیان بۆ گۆڕینی دەستوور رایگەیاند، "تورکیا لەو دەستوورە رزگاری دەبێت کە بەرهەمی کودەتایەکی سەربازییە، سەرباری ئەوەی چەندان جار گۆڕانکاریشی تێدا کراوە. بۆیە دەستووری نوێ، دەستوورێکی نوێ و مەدەنی و دیموکرات و گشتگیر دەبێت. بۆچوونی هەموو لایەک وەردەگرین، بۆ نووسینەوەی دەستوورێکی نوێ."
سەبارەت بە بڕیاردەری سەرەکی لە گۆڕینی دەستوور، نوعمان کورتولموش گوتی، "بڕیاری گۆڕینی دەستوور لای پەرلەمانی تورکیایە. ئەندامانی پەرلەمانی تورکیا دەنگ لەسەر دەستوورە تازەکە دەدەن، بۆیە هیواخوازین ئەو دەستوورە نوێیە شایەنی سەدەی دووەمی تەمەنی کۆماری تورکیا بێت."
فراکسیۆنەکانی ئاکپارتی و مەهەپە، پرۆژەی هەموارکردنەوەی دەستووری تورکیا دەخەنە بەردەم پەرلەمانی وڵاتەکەیان. ئەو پرسە چارەنووسسازە پێویستی بە پشتیوانیی سەرجەم فراکسیۆنەکانی پەرلەمانە، هەربۆیە بڕیاریانداوە لەگەڵ فراکسیۆنەکانی پەرلەمان کۆببنەوە.
لە سەرەتای ئەم مانگەوە، سەرۆکی پەرلەمانی تورکیا سەردانی فراکسیۆنە سیاسییەکانی ناو پەرلەمانی تورکیای کردووە بۆ گفتوگۆکردن لەبارەی هەنگاوەکان بۆ گۆڕینی دەستووری تورکیا. لەو چوارچێوەیەدا نوعمان کورتولموش لەگەڵ دەم پارتی و پارتی گەلی کۆماری و مەهەپە کۆبووەتەوە.