سەرۆکی دەستەی باڵای هەڵبژاردنەکانی تورکیا: 47.08٪ی سندووقەکان کراونەتەوە
رووداو دیجیتاڵ
سەرۆکی دەستەی باڵای هەڵبژاردنەکانی تورکیا ئاشکرای دەکات، هیچ کێشەیەک لە تۆمارکردنی داتاکان نییە و بەردەوامن لە کۆکردنەوەی داتاکان و بڵاوکردنەوەی ئەنجامەکان.
ئەحمەد یەنەر، سەرۆکی دەستەی باڵای هەڵبژاردنەکانی تورکیا لە کۆنگرەیەکی رۆژنامەڤانیدا رایگەیاند، ژمارەکان لە بنکەی شارەدێیەکان بۆ بنکەی شارۆچکەکان و لەوێشەوە بۆ لقی شارەکانی دەستەی باڵای هەڵبژاردنەکان دێت. هەروەها هەندێک سندووق چەندینجار دەژمێردرێنەوە بەهۆی بوونی تانە و رەخنەوە. ئەمانە هۆکاری دواخستنی داتاکانن.
یەنەر پێداگری لەوەکرد، کە بەهیچ شێوەیەک کێشە لە ئارادانییە، بەڵام میکانیزمی کارکردن زۆر وردە و ناچارین بەوپەڕی هەستیارییەوە کارەکان بەڕێوەببەین.
سەرۆکی دەستەی باڵای هەڵبژاردنەکان راشیگەیاند، تائێستا 47.08٪ی دەنگەکانی ناوخۆ و 12.6٪ی دەنگەکانی دەرەوە لەناو داتاکاندا تۆمارکراون و کارەکانیش لەم چوارچێوەیەدا بەردەوامن.