بوومەلەرزەیەک بە گوڕی 4.4 پلەی رێختەر لە تورکیا روویدا

 

سه‌رۆكایه‌تیی بەڕێوەبردنی كاره‌سات و باری له‌ناكاوی تورکیا- ئافاد رایگەیاند، کاژێر 08:28 خولەکی بەیانی رۆژی دووشەممە 13ـی تشرینی دووەمی 2023، بوومەلەرزەیەک بەگوڕی 4.4 پلەی رێختەر لە سنووری شارۆچکەی یەشیلئۆڤا سەر بە پارێزگای بۆردور روویدا. 

 

لە راگەیێندراوەکەی ئافاد هاتووە، بوومەلەرزەکە بە قووڵایی 13.23 کم تۆمارکراوە. 

 

دەزگای ئافاد راشیگەیاند، لەدوای بوومەلەرزە بەهێزەکەی 6ـی شووباتی مەرەشەوە 38 هەزار و 14 بوومەلەرزە و پاشلەرزە روویانداوە، کە 12یان شەش پلە و 71یان پێنج پلە بوون.

 

کاژێر 04:17 خولەکی بەرەبەیانی رۆژی 6ـی شوباتی 2023، بوومەلەرزەیەک بەگوڕی 7.7 پلەی رێختەر کە چەقەکەی مەرەشی باکووری کوردستان بوو، 11 پارێزگای تورکیا و باکووری کوردستانی هەژاند. بەگوێرەی ئامارە فەرمییەکان، 50 هەزار و 783 کەس لە باکووری کوردستان و تورکیا گیانیان لەدەستدا و زیاتر لە 107 هەزار 204 کەس برینداربوون.

 

بوومەلەرزەکە کاریگەری گەورەی لەسەر رۆژئاوای کوردستان و سووریا هەبوو، بە تایبەتی هەرێمی عەفرینی رۆژئاوای کوردستان و پارێزگای ئیدلبی سووریا.