رووداو دیجیتاڵ
لە هەژماری تایبەتی خۆی لە تۆڕی ئێکس، وەزیری ناوخۆی تورکیا، دەستگیرکردنی چوار هەزار و 951 "تاوانباری داواکراو بۆ دادگە"ـی راگەیاند.
ئەمڕۆ دووشەممە، 11ـی کانوونی یەکەمی 2023، عەلی یەرلیکایا رایگەیاند، "لە چوار رۆژدا لە رێگەی ئۆپەراسیۆنەکانی "ئابڵووقە" کە لە 81 پارێزگای تورکیا و باکووری کوردستاندا بەڕێوەچوو، چوار هەزار و 951 تاوانبار، دەستگیرکران".
وەزیری ناوخۆی تورکیا روونیکردەوە، 18 کەسیان زیاتر لە 10 ساڵە داواکراون، 53یان زیاتر لە پێنج ساڵە و چوار هەزار و 880یان 1-5 ساڵە بە تۆمەتی جیاواز داواکراون.
لەنێو تاوانبارە داواکراوەکاندا، 536 کەس بە تۆمەتی دزیکردن، 257 کەس بەتۆمەتی فێڵکردن و ساختەکاری، 101 کەس بەتۆمەتی تاڵانکردن، 55 کەس بە تۆمەتی کوشتن و 55 کەسی دیکەش بە تۆمەتی دەستدرێژی سێکسی داواکراوبوون.
راشیگەیاند، ئۆپەراسیۆنەکان بەهاوبەشی تیمەکانی پۆلیس، ئاسایش، جەندرمە و هەواڵگری ناوخۆ کراون و لە ماوەی 48 کاژێردا ئەو کەسانەیان دەستگیرکردوون، هەروەها دوای تەواوبوونی لێکۆڵینەوەکان و نوێکردنەوەی دۆسێکانیان، رادەستی دادگە دەکرێن بۆ سزادانیان.
ئەم ئۆپەراسیۆنانەی وەزارەتی ناوخۆی تورکیا لە دژی داواکراوەکان ئەنجامی دەدات، بەپێی بەرنامەیەکی تایبەتی مانگانە لەلایەن ژووری ئۆپەراسیۆنە تایبەتەکانی وەزارەتەکەوە بەڕێوەدەچێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ