رووداو دیجیتاڵ
بڕیارە لە ئەمڕۆ دووشەممە 11ی کانوونی یەکەمی 2023وە رەشنووسی بودجەی ساڵی دارایی 2024ی تورکیا لە پەرلەمانی ئەو وڵاتە تاوتوێ بکرێت.
رۆژی 7ی مانگ، نوعمان کورتولموش، سەرۆکی پەرلەمانی تورکیا رایگەیاند، لە دووشەممەی داهاتووەوە رەشنووسی بودجەی گشتیی ساڵی دارایی 2024 لە پەرلەمانی تورکیا خوێندنەوەی بۆ دەکرێت. ئاماژەی بەوەش کرد، پێویستە لە ماوەی 10 رۆژدا سەرجەم مادەکانی ئەو رەشنووسی بودجەیە بخرێنە دەنگدان و پەسند بکرێن.
رۆژی 24ی تشرینی دووەمی 2023 رەشنووسی بودجەی گشتیی ساڵی دارایی 2024ی تورکیا لە لیژنەی پلاندانان و بودجەی پەرلەمانی تورکیا پەسند کرا. رۆژی 27ی تشرینی دووەمیش لیژنەکە رەشنووسە پەسندکراوەکەی رادەستی سەرۆکایەتیی پەرلەمانی تورکیا کرد.
چاوەڕوان دەکرێت لە دەستپێکی کۆبوونەوەکەی پەرلەمانی تورکیادا جەودەت یڵماز، یاریدەدەری سەرۆککۆمار گوتاری حکومەت سەبارەت بەو بودجەیە پێشکێش بکات. دواتر ئۆزگور ئۆزەل، سەرۆکی فراکسیۆنی جەهەپە گوتار پێشکێش دەکات.
هەر لە کۆبوونەوەکەدا عەبدوڵڵا گولەر بەناوی فراکسیۆنی ئاکپارتی؛ تونجەر باکرهان و تولای هاتیمئۆغوڵڵاری هاوسەرۆکانی هەدەپ بە هاوبەشی؛ ئەرکان ئاکچای بەناوی فراکسیۆنی مەهەپە؛ کۆڕای ئایدن بەناوی فراکسیۆنی ئیی پارتی؛ بولەنت کایا بە ناوی فراکسیۆنی سەعادەت؛ فاتیح ئەربەکان بە ناوی فراکسیۆنی سەرلەنوێ خۆشگوزەرانی و چیدەم کڵچگون بەناوی فراکسیۆنی دەبەپە گوتار پێشکێش دەکەن.
کۆبوونەوەکانی پەرلەمانی تورکیا بۆ بابەتی بودجە 10 رۆژ بەردەوام دەبن و مادە مادە خوێندنەوەیان بۆ دەکرێت. لە دوایین کۆبوونەوەدا دەنگ لەسەر کۆی گشتیی بودجەکە دەدرێت. بەگوێرەی رۆژژمێری ئەنجوومەنی گشتی، پێویستە کۆبوونەوەکان رۆژی 24ی مانگ کۆتاییان بێت و بودجەی گشتیی ساڵی دارایی 2024ـی تورکیا پەسند بکرێت.
20ی تشرینی یەکەمی 2023 یەکەم کۆبوونەوەی رەشنووسی بودجەی ساڵی دارایی 2024 لە پەرلەمانی تورکیا ئەنجامدرا. گفتوگۆکانی لیژنەی پلاندانان و بودجەی پەرلەمانی تورکیا 36 رۆژیان خایاند؛ 70 کۆبوونەوە کران و 218 کاژێر تاوتوێی بابەتەکان کرا.
بودجەی گشتیی ساڵی دارایی 2024ـی تورکیا، 384.15 ملیار دۆلارە، ئەوە لە کاتێکدایە داهاتی گشتیی ساڵی 2023ی تورکیا 289.36 ملیار دۆلارە و بەمەش کورتهێنانی بودجەکە 24.67٪ دەبێت.
بودجەی بەشێک لە سەرۆکایەتییەکان و وەزارەتەکان بەمشێوەیەن:
پەرلەمانی تورکیا: 330.37 ملیۆن دۆلار
سەرۆکایەتیی کۆمار: 425.54 ملیۆن دۆلار – 228.64 ملیۆن دۆلار
وەزارەتی گەنجینە و دارایی: 158.122 ملیار دۆلار
وەزارەتی پەروەردە: 37.843 ملیار دۆلار
وەزارەتی تەندروستی: 25.377 ملیار دۆلار
وەزارەتی بەرگری: 15.259 ملیار دۆلار
بەڕێوەبەرایەتیی گشتیی ئاسایش: 10.582 ملیار دۆلار
وەزارەتی داد: 6.883 ملیار دۆلار
فەرماندەیی هێزەکانی جەندرمە: 6.571 ملیار دۆلار
سەرۆکایەتیی کاروباری ئاینی: 3.181 ملیار دۆلار
وەزارەتی ناوخۆ: 2.643 ملیار دۆلار
وەزارەتی دەرەوە: 1.086 ملیار دۆلار
وەزارەتی وزە و سەرچاوە سروشتییەکان: 1.674 ملیار دۆلار
دەزگای هەواڵگریی نیشتمانیی (میت): 605 ملیۆن دۆلار
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ