ئەردۆغان سەردانی ئامەد و رووها دەکات

 

 

بۆ بەشداریکردن لە هەشتەمین کۆنگرەی ئاسایی پارتی داد و گەشەپێدان رەجەب تەیب ئەردۆغان، سەرۆککۆماری تورکیا و سەرۆکی ئاکپارتی ئەمڕۆ شەممە 11ی کانوونی دووەمی 2025 کاژێر 13:00 دەچێتە ئامەد، کاژێر 15:00یش سەردانی رووها دەکات.

 

سەبارەت بە سەردانەکەی ئەردۆغان بۆ ئامەد و ئەگەری پەیامەکانی لەبارەی پرۆسەی چارەسەری، محەممەد کایا، سەرۆکی ژووری پیشەسازی و بازرگانیی ئامەد رۆژی هەینی 10ی کانوونی دووەمی 2025 میوانی بووڵتەنی کاژێر 15:00ی رووداو بوو، گوتی، "ئەوەی لە سەرۆککۆمارمان چاوەڕوان دەکرێت، ئەوەیە لێدوانەکانی ببنە مایەی بەهێزترکردنی پرۆسەکە."

 

کایا جەختی لە گرنگیی رۆڵی ئەردۆغان لە پرۆسەکەدا کردەوە و گوتی، "گرنگە متمانە بە خەڵک بدات کە دەبێتە گەرەنتیکاری ئەم پرۆسەیە و پشتگیریی لێ دەکات."

 

ئاکپارتی بەردەوامە لە کۆبوونەوەکانی بە مەبەستی ئامادەکاری بۆ هەشتەمین کۆنگرەی ئاسایی و رەجەب تەیب ئەردۆغان سەردانی پارێزگە جیاوازەکانی باکووری کوردستان و تورکیا دەکات و تێیاندا بەشدار دەبێت.