رووداو دیجیتاڵ
هەفتەی رابردوو شاندی دەم پارتی سەردانی ئەو پارتە سیاسییانەی کرد لە پەرلەمانی تورکیا پەرلەمانتاریان هەیە، ئەمڕۆش سەردانی سەڵاحەدین دەمیرتاش دەکات.
بەگوێرەی راگەیێندراوی نووسینگەی دەم پارتی، ئەمڕۆ شەممە 11-01-2025 شاندی دەم پارتی دەچێتە گرتووخانەی ئەدیرنە بە مەبەستی بینین و دیداری سەڵاحەدین دەمیرتاش، هاوسەرۆکی پێشووتری هەدەپە.
شاندەکە لە سری سورەیا ئۆندەر، پەروین بوڵدان و ئەحمەد تورک پێکدێت. بڕیارە کاژێر 13:00 سەردانی دەمیرتاش بکات.
هەروەها بڕیارە سبەی یەکشەممەش شاندەکە بچێتە گرتووخانەی کاندرا لە پارێزگەی کۆجائەلیی تورکیا و لەگەڵ فیگەن یوکسەکداغ، هاوسەرۆکی پێشووتری هەدەپە دیداری دەبێت.
سەرچاوەیەکی نزیک لە دەم پارتی بە عومەر سۆنمەز، پەیامنێری تۆڕی میدیایی رووداو لە ئیستەنبووڵی راگەیاند، دەمیرتاش بەو پرۆسەیە گەشبینە دەستی پێکراوە.
فیگەن یوکسەکداغ و سەڵاحەدین دەمیرتاش، هاوسەرۆکانی پێشووتری هەدەپە لە ساڵی 2016وە لە زیندانن، لەنێو ئەو 108 ئەندام و بەرپرسەی هەدەپەدان کە لە دۆسیەی رووداوەکانی کۆبانێ دادگایی کران.
شاندەکە دوای دیداری دەمیرتاش و یوکسەکداغ، دەچێتەوە ئیمرالی و لەگەڵ عەبدوڵڵا ئۆجەلان کۆدەبێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ