رووداو دیجیتاڵ
بەکارهێنانی مۆبایل لەلایەن سەربازانی سوپای تورکیا لەلایەن وەزارەتی بەرگرییەوە قەدەخە کرا و سزای قورس بەسەر سەرپێچیکاران جێبەجێ دەکرێت.
ئێوارەی ئەمڕۆ پێنجشەممە، 11ـی کانوونی دووەمی 2024، لیوا زەکی ئاکتورک، راوێژکاری پەیوەندییەکان و راگەیاندن لە وەزارەتی بەرگریی تورکیا لە کۆنگرەی رۆژنامەڤانی هەفتانەیدا رایگەیاند، وەزارەتی بەرگریی فەرمانیکردووە بە قەدەخەکردنی بەکارهێنانی مۆبایلی ژیر بۆ سەربازانی سوپای تورکیا لە کاتی ئۆپەراسیۆنەکان، ناوچەکانی هێڵی گەرم، جموجۆڵی سەربازی، گواستنەوەی هێز، خاڵە سنوورییەکان، کۆبوونەوەکان و لە کاتی ئەرکی سەربازیدا.
باسی لەوەشکرد، تەنیا لە کاتی پشوودا کاتێکی دیاریکراویان پێدەدرێت بۆ بەکارهێنانی سۆشیال میدیا بەو مەرجەی وێنە و پۆست بڵاونەکەنەوە، بەپێچەوانەوە بەپێی فەرمانە نوێیەکە، بەکارهێنانی مۆبایل و سۆشیال میدیا بە تاوانی پابەند نەبوون بە دیسپلینی سەربازیی تۆمەتبار دەکرێن و بە توندی سزا دەدرێن.
لیوا زەکی ئاکتورک، لەبارەی فڕینی فڕۆکە جەنگییەکانی سوپای تورکیا بە ئاسمانی ئیدلب، رایگەیاند، رۆژی 7ـی مانگ سەرچاوە هەواڵگرییەکان زانیاریی بوونی هەڕەشە و ئەگەری هێرشکردنە سەر سەربازگەکانیان لە ناوچەکانی کەمکردنەوەی گرژییەکان گەیشت و لە رێگەی ئۆپەراسیۆنێکەوە توانرا سێ درۆن تێکبشکێندرێن کە ئامادەی هێرشکردن بوون بۆ سەر خاڵەکانی سوپا و بۆ ئەم مەبەستەش فڕۆکە جەنگییەکان چەند کاژێرێک لە ئاسمانی ئیدلیب سوڕانەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ