رووداو دیجیتاڵ
لە پەرلەمانی تورکیادا 512 دۆسیەی تاوان لە دژی پەرلەمانتارانی فراکسیۆنی هەدەپ بۆ لێسەندنەوەی پارێزبەندییان، تۆمار کراوە. ژنە پەرلەمانتارێکی هەدەپیش زۆرترین دۆسیەی لە دژ کراوەتەوە، کە 92 دۆسیەیە.
لیژنەی دەستوور و دادی پەرلەمانی تورکیا، ژمارەی دۆسیەکانی تاوان بۆ لێسەندنەوەی پارێزبەندی لە دژی پەرلەمانتارانی 28مین خوولی پەرلەمان بڵاوکردەوە و رایگەیاند، تاوەکو ئێستا 733 دۆسیەی تاوان بۆ لێسەندنەوەی پارێزبەندیی پێشکێش کراون، کە 512یان لە دژی پەرلەمانتارانی پارتی یەکسانی و دیموکراتیی گەلان - هەدەپ تۆمار کراوە.
هەر لەنێو فراکسیۆنی (هەدەپ)، لە کۆی 512 دۆسیەی تاواندا، 97 دۆسیە لە دژی سالیحە ئایدەنیز، پەرلەمانتاری بازنەی مێردین تۆمار کراون.
لە کۆی ئەو دۆسیانەی لە دژی هەدەپ تۆمار کراون، 326یان تایبەتن بە تۆمەتەکانی "بانگەشەکردن بۆ رێکخراوی تیرۆریستی جوداخوازی پەکەکە، رێکخستن و بەشداربوون لە خۆپێشاندان، گردبوونەوە، سەکۆ هەڵدان و کۆبوونەوەی نایاسایی بێ مۆڵەت و هەروەها هاندان بۆ رق و کینە لە دژی دەوڵەت."
دۆسیەکانی تاوان دوای پەسندکردنیان لەلایەن داواکاری گشتیی کۆماریی ئەنقەرە، رەوانەی وەزارەتی داد دەکرێن، وەزارەتەکەش بە نووسراوی فەرمی پێشکێشی سەرۆکایەتیی پەرلەمانی دەکات.
بەپێی رێکارەکان، نوعمان کورتولموش، سەرۆکی پەرلەمانی تورکیا، دۆسیەکانی تاوان ئاراستەی فەرمانگەی لێکۆڵینەوەی پەرلەمان دەکات بۆ بەدواداچوون لە نەبوونی کەموکورتی لە دۆسیەکان و دواتر ئاراستەی لیژنە پەیوەندیدارەکانی دەکات. دوای پەسندکردنیان لە رێگەی دەستەی سەرۆکایەتییەوە دەخرێتە بەرنامەی خشتەی کاری ئەنجوومەنی گشتیی بۆ ئەوەی دەنگی لەسەر بدرێت.
بەگوێرەی ئامارەکانی وەزارەتی دادی تورکیا، لە خوولی رابردووی پەرلەماندا، 1418 دۆسیەی تاوان بۆ وەرگرتنەوەی متمانە و لێسەندنەوەی پارێزبەندی دژی پەرلەمانتاران پێشکێشی سەرۆکایەتیی پەرلەمان کرابوون. لەو ژمارەیەدا 1101 دۆسیە لە دژی پەرلەمانتارانی هەدەپە تۆمار کرابوون. سێ پەرلەمانتاری هەدەپەش بە ناوەکانی سەمرا گوزەل، لەیلا گوڤەن و موسا فارسئۆغوڵڵاری متمانەیان لێسەندرایەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ