پەرلەمانتارێکی کورد لەنێو پەرلەمانی تورکیا: کاتێک ناوی کوردستان دەهێنین قیامەت دروست مەکەن

رۆژی 9ـی تشرینی دووەمی 2023، سینان چیفتەیورەک، پەرلەمانتاری وانی فراکسیۆنی هەدەپ، لە کۆبوونەوەیەکی ئەنجوومەنی گشتیی پەرلەمانی تورکیادا گوتارێکی پێشکێش کرد و رەخنەی لە فراکسیۆنەکانی ئاکپارتی، مەهەپە، ئیی پارتی، سەرلەنوێ خۆشگوزەرانی و پارتی یەکبوونی مەزنی تورکیا گرت، ئەوەش بەهۆی ئەوەی رێگری دەکەن لە بەکارهێنانی وشەی کوردستان لەنێو پەرلەمانی تورکیادا. 

 

سینان چیفتەیورەک گوتی، "کۆماری تورکیا بوونی گەلی کورد قبووڵ ناکات. ئێستا ئێوە تازە دەڵێن کورد هەیە و دەڵێن کوردەکان برای ئێمەن. دەبێ نکۆڵی لە بوونی کورد نەکەن. دەمانەوێ بزانین کە بۆچی نکۆڵی لە بوونی کورد دەکەن؟"

 

ئەو پەرلەمانتارە گوتیشی، "دوێنێ ئۆپۆزیسیۆن دەیگوت بۆچی حکومەتی تورکیا رەخنە لە چین ناگرێت، ئەوەش بەهۆی ئەو گوشارە بەردەوامانەی دەیخاتە سەر تورکەکانی ئویگور؟ منیش دەڵێم ناتوانێت، چونکە هەر کاتێک رەخنە لە چین بگرێت، ئەوانیش کارتی کوردستان بەکاردەهێنن. حکومەتی تورکیا ئەم بابەتە لە من باشتر دەزانێت. هەر کە رەخنەیان لێ بگرێت، پێی دەڵێن، تورکەکانی ئویگور قەوارەی فەرمییان هەیە، بەڵام ئێوە نکۆڵی لە کورد دەکەن. کاتێک دەرزی لەنێو چاوی چین دەبینن، پێویستە شوژنی نێو چاوی تورکیاش ببینن. کاتێک وشەی کوردستان بەکاردەهێنین، قیامەت دروست مەکەن". 

 

سینان چیفتەیورەک رایگەیاند، "هەر مرۆڤێک دایکی هەیە. مرۆڤی بێ دایکتان بینیووە؟ نییە. لە هیچ شوێنێکی ئەم جیهانەش گەلی بێ خاک نییە. کوردیش خاکی خۆی هەیە و وڵاتی هەیە، بەڵام ئێوە قبووڵی ناکەن. دەچنە باشووری کوردستان و ئاڵاکەتان لە پاڵ ئاڵای باشووری کوردستان دادەنێن. ئەوانتان بەلاوە پەسندە، بەڵام بۆچی ئەوە بۆ ئێمە قبووڵ ناکەن؟ بۆچی ناتوانن بڵێن کوردستان؟ ئەمە لای خۆتان وەک تێبینی بنووسن. سبەی شانازی بەوەوە دەکەن و دەڵێن، گەورەترین کوردستان، کوردستانی ئێمەیە. ئەمە دوور نییە و دەمەوێ باوەڕ بەمە بکەن".

 

رۆژی 15ـی تشرینی یەکەمی 2023، پارتی چەپی سەوزی تورکیا – یەسەپە، لە چوارەمین کۆنگرەی ئاسایی خۆیدا ناوی بۆ پارتی دیموکرات و یەکسانی - هەدەپ گۆڕی و رۆژی 20ـی تشرینی یەکەم، ناوی فراکسیۆنەکەشی بۆ فراکسیۆنی هەدەپ گۆڕی و بەمەش بووە نوێترین فراکسیۆنی پەرلەمانی تورکیا. 

 

ئەو پارتە لە هەڵبژاردنی 14ی ئایاری تورکیادا 4 ملیۆن و 803 هەزار و 737 دەنگیان بەدەستهێنابوو و خاوەن 57 کورسی پەرلەمانە.