رووداو دیجیتاڵ
سەرۆکی لیژنەی داد لە پەرلەمانی تورکیا پەیامێکی ئاراستەی ھاوتاکانی خۆی لە پەرلەمانەکانی وڵاتانی جیهان کرد، تێیدا داوای لێکردوون کە ھەوڵی زیاتر بدەن لەپێناو دەستەبەرکردنی ئاگربەست و بەدیهێنانی ئاشتییەکی ھەمیشەیی لە فەلەستین.
لە پەیامێکی سەرۆکی لیژنەی دادی پەرلەمانی تورکیادا ئاماژە بەوە دراوە، بەردەوامبوونی ململانێیەکان لە ناوچەکە و پێشێلکردنی بنەماکانی یاسای مرۆیی، پرسی گرنگی مافی مرۆڤ دەوروژێنێت کە پێویستی بە گرنگیدانی بەپەلەی دەوڵەتانە.
جونەیت یوکسەل، سەرۆکی لیژنەی دادی پەرلەمانی تورکیا ئاماژەی بە قەبارە و کاریگەریی ئەو ھێرشە کردووە کە ئیسرائیل بۆ سەر کەرتی غەززە و کەناری رۆژئاوا ئەنجامی دەدات و رایگەیاندووە، لەدەستدانی ژیانی خەڵکی بێتاوان، بەتایبەتی منداڵان و ژنان، ھەروەھا وێرانکردنی نەخۆشخانەکان و ژێرخانی کارەبا و ئاو، پرسگەلێکن کە بە جدی جێگای نیگەرانی و مەترسین.
جەختیشی کردووەتەوە، نوێنەرانی لیژنەکانی داد و یاسا لە پەرلەمانەکان، رۆڵی گرنگ لە بەرگریکردن لە سەروەریی یاسا، ئاشتی و دادوەری لە سەرتاسەری جیهان دەگێڕن و گوتوویەتی، "بەرپرسیارێتیی ھەموومانە کە پاراستنی مافەکانی مرۆڤ دەستەبەر بکەین، ھەروەھا کردە تووندئاژۆیی و دەستدرێژییەکان سەرکۆنە بکەین."
لە بەشێکی دیکەی پەیامەکەیدا، داوای ئاگربەستی بەپەلە و ھەروەھا سەرکۆنەکردنی بۆردوومان و تووندوتیژی لە فەلەستین و گەیاندنی یارمەتیی مرۆیی بەپەلە بۆ غەززە کراوە.
ھەروەھا لە پەیامەکەدا، داوای لێکۆڵینەوەیەکی تەواو و بێلایەنانە سەبارەت بە کۆمەڵکوژی و پێشێلکردنی مافەکانی مرۆڤ، ھەروەھا پاڵپشتیکردن لە ھەوڵە نێودەوڵەتییەکان بۆ دۆزینەوەی چارەسەرێکی ئاشتییانە و ھەمیشەیی بۆ ململانێکە لەسەر بنەمای دامەزراندنی دوو دەوڵەتی، ئەوەیش لە چوارچێوەی سنوورەکانی ساڵی 1967دا بەدیبکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ